Mohinikritam Kamadeva Stotram

 मोहिनिकृतं कामदेवस्तोत्रम् 

मोहिन्युवाच ।
सर्वेन्द्रियाणां प्रवरं विष्णोरंशं च मानसम् ।
तदेव कर्मणां बीजं तदुद्भव नमोऽस्तु ते ॥ ६६॥

स्वयमात्मा हि भगवांज्ञानरूपो महेश्वरः ।
नमो ब्रह्मञ्जगत्स्रष्टस्तदुद्भव नमोऽस्तु ते ॥ ६७॥

सृष्टिः सर्वशरीरेषु दृष्टिश्च योगिनामपि ।
जगत्साध्य दुराराध्य दुर्निवार नमोऽस्तु ते ॥ ६८॥

सर्वाजित जगज्जेतर्जीव जीव मनोहर ।
रतिबीज रतिस्वामिन् रतिप्रिय नमोऽस्तु ते ॥ ६९॥

शश्वद्योषिदधिष्ठान योषित्प्राणाधिकप्रिय ।
योषिद्वाहन योषास्त्र योषिद्बन्धो नमोऽस्तु ते ॥ ७०॥

पतिसाध्यकराशेषरूपाधार गुणाश्रय ।
सुगन्धिवातसचिव मधुमित्र नमोऽस्तु ते ॥ ७१॥

शश्वद्योनिकृताधार स्त्रीसन्दर्शनवर्धन ।
विदग्धानां विरहिणां प्राणान्तक नमोऽस्तु ते ॥ ७२॥

अकृपा येषु तेऽनर्थास्तेषां ज्ञानविनाशनम् ।
अनूहरूपभक्तेषु कृपासिन्धो नमोऽस्तु ते ॥ ७३॥

तपस्विनां च तपसां विघ्नबीजावलीलया ।
मनः सकामं मुक्तानां कर्तुं शक्त नमोऽस्तु ते ॥ ७४॥

तपःसाध्याश्चाराध्याश्च सदैवं पाञ्चभौतिकाः ।
पञ्चेन्द्रियकृताधार पञ्चबाण नमोऽस्तु ते ॥ ७५॥

इति ब्रह्मवैवर्तपुराणे श्रीकृष्णजन्मखण्डे पूर्वभागे एकत्रिंशाध्यायान्तर्गतं
         मोहिनिकृतं कीमदेवस्तोत्रं समाप्तम् ।

ब्रह्मवैवर्तपुराण । श्रीकृष्णजन्म, पूर्वभाग । अध्याय ३१/६६-७५॥


brahmavaivartapurANa . shrIkRRiShNajanma, pUrvabhAga . adhyAya 31/66-75..

Proofread by PSA Easwaran