Shri Pragajibhaktamahima Ashtakam

 श्रीप्रागजीभक्तमहिमाष्टकम् 

(रथोद्धता छन्द)
ज्ञानधर्म-सुविरक्ति-शालिनं
श्रीहरौ रतिविशिष्ट-मानसम् ।
धर्मयुक्त-पुरुषाधिक-प्रियं
प्राग्जितं गुरुमहं नमामि तम् ॥ १॥

ब्रह्मरूप-मखिलार्थदं विभुं
योगयुक्त-मुरुपुण्य-सङ्गतम् ।
स्वप्रताप-निहताखिलासुरं
प्राग्जितं गुरुमहं नमामि तम् ॥ २॥

दिव्यनिर्गुण-मनोरमाकृतिं
नैककोटि-रविचन्द्र-भासुरम् ।
द्रष्टमात्र-नरनाटकं सदा
प्राग्जितं गुरुमहं नमामि तम् ॥ ३॥

अक्षराधिपति-तुल्यतां गतं
स्वान्तरे हि हरिमूर्तिदर्शितम् ।
सर्वजीव-हृदयस्थ-वेदनं
प्राग्जितं गुरुमहं नमामि तम् ॥ ४॥

जन्ममृत्यु-भवबन्धमोक्षणं
प्राज्यशिष्य-शुचिबोधकं मुदा ।
स्वाश्रितामितजनैः सुपूजितं
प्राग्जितं गुरुमहं नमामि तम् ॥ ५॥

कृष्णशासन-विलम्बनारुचिं
दुष्टलोक-विकृतानय-क्षमम् ।
मानमत्सर-नरा-विबोधितं
प्राग्जितं गुरुमहं नमामि तम् ॥ ६॥

इन्द्रियाश्व-विजितं क्षमाभृतं
कामदोष-दहने पटुं भृशम् ।
निर्निमेष-नयनं परापहं
प्राग्जितं गुरुमहं नमामि तम् ॥ ७॥

भूरि कोमलसुधा-समाक्षरं
द्रग्विलास-हृत-भक्तचेतसम् ।
नीलकण्ठ-सुततुल्य-विग्रहं
प्राग्जितं गुरुमहं नमामि तम् ॥ ८॥

(शार्दूलविक्रीडितम्)
श्रीमन्निर्गुण-मूर्तये च विभवे ज्ञानोपदेष्ट्रे सदा
सर्वज्ञाय समग्र-साधुगुणिने मायापराय स्वयम् ।
सर्वैश्वर्यवते निजाश्रितजनानां दोषहर्त्रे च मे
प्राग्जित्-सद्गुरवे नमोस्तु सततं ब्रह्मात्ममुक्तायते ॥ ९॥

इति स्वामी यज्ञपुरुषदासजीमहारजविरचितं
श्रीप्रागजीभक्तमहिमाष्टकं सम्पूर्णम् ।