॥ प्रणामप्रणयस्तवम् ॥

कन्दर्पकोटिरम्याय स्फुरदिन्दीवरत्विषे । जगन्मोहनलीलाय नमो गोपेन्द्रसूनवे॥ १॥ कृष्णलाकृतहाराय कृष्णलावण्यशालिने । कृष्णाकूलकरीन्द्राय कृष्णाय करवै नमः ॥ २॥ सर्वानन्दकदम्बाय कदम्बकुसुमस्रजे । नमः प्रेमावलम्बाय प्रलम्बारिकनीयसे ॥ ३॥ कुण्डलस्फुरदंसाय वंशायत्तमुखश्रिये । राधामानसहंसाय व्रजोत्तंसाय ते नमः ॥ ४॥ नमः शिखण्डचूडाय दण्डमण्डितपाणये । कुण्डलीकृतपुष्पाय पुण्डरीकेक्षणाय ते ॥ ५॥ राधिकाप्रेममाध्वीकमाधुरीमुदितान्तरम्। कन्दर्पवृन्दसौन्दर्यं गोविन्दमभिवादये ॥ ६॥ शृङ्गाररसशृङ्गारं कर्णिकारात्तकर्णिम् । वन्दे श्रिया नवाभ्राणां बिभ्राणां विभ्रमं हरिम् ॥ ७॥ साध्वीव्रतमणिव्रातपश्यतोहरवेणवे । कल्हारकृतचूडाय शङ्खचूडभिदे नमः ॥ ८॥ राधिकाधरबन्धूकमकरन्दमधुव्रजम् । दैत्यसिन्धुरपारीन्द्रं वन्दे गोपेन्द्रनन्दनम् ॥ ९॥ बर्हेन्द्रायुधरम्याय जगज्जीवनदायिने । राधाविद्युद्वृताङ्गाय कृष्णाम्भोदाय तै नमः ॥ १०॥ प्रेमान्धवल्लवीवृन्दलोचनेन्दीवरेन्दवे । काश्मीरतिलकाढ्याय नमः पीताम्बराय ते ॥ ११॥ गीर्वाणेशमदोद्दामदावनिर्वाणनीरदम् । कुन्दुकीकृतशैलेन्द्रं वन्दे गोकुलबान्धवम् ॥ १२॥ दैन्यार्णवे निमग्नोऽस्मि मन्तुग्रावमदार्दितः । दुष्टे कारुण्यपारीण मयि कृष्ण कृपां कुरु ॥ १३॥ आधारोऽप्यपराधानामविवेकहतोऽप्यहम् । त्वत्कारुण्यप्रतीक्षोऽस्मि प्रसीद मयि माधव ॥ १४॥ इति प्रमाणप्रणयस्तवं समाप्तम् ॥ Proofread by PSA Easwaran psaeaswaran at gmail.com

% Text title            : praNAmapraNayastavam
% File name             : praNAmapraNayastavam.itx
% itxtitle              : praNAmapraNayastavam
% engtitle              : praNAmapraNayastavam
% Category              : deities_misc
% Location              : doc_deities_misc
% Sublocation           : deities_misc
% Language              : Sanskrit
% Subject               : philosophy/hinduism/religion
% Transliterated by     : PSA Easwaran psaeaswaran at gmail.com
% Proofread by          : PSA Easwaran psaeaswaran at gmail.com
% Description-comments  : Devi book stall, Kodumgallur, Kerala
% Source                : Sthothra Rathnaakaram, edited by N. Bappuravu, 2010
% Latest update         : August 6, 2016
% Send corrections to   : Sanskrit@cheerful.com
% Site access           : http://sanskritdocuments.org
This text is prepared by volunteers and is to be used for personal study and research. The file is not to be copied or reposted for promotion of any website or individuals or for commercial purpose without permission. Please help to maintain respect for volunteer spirit.

BACK TO TOP