श्रीरामानुजवर्णनाश्लोकाः
श्रीवेङ्कटाध्वरिगुरुभिरनुगृहीताः
॥ श्रीः ॥
॥ श्रीमते रामानुजाय नमः ॥
॥ श्रीमते वेङ्कटाध्वरिणे नमः ॥
एषा भूतपुरी निरीक्षितचरी दोषापहन्त्री मया
श्रीमानत्र गुणाब्धिराविरभवत् रामानुजार्यो मुनिः ।
त्रय्यन्तामृतसिन्धुमन्थनभवद्धय्यङ्गवीनात्मकं
विज्ञानं यदुपज्ञमेव विदुषामद्यापि विद्योतते ॥ १॥
कामादिवैरिगणभीमानवद्यनिजनामाभिलाषगरिमा
वैमानिकार्यसमभूमा मतौ वचनसीमातिलङ्घिमहिमा ।
श्रीमाननूनकलसोमाननो विमलधामावमानितरविः
क्षेमाणि जृम्भयतु भूमावमुत्र स च रामानुजो यतिपतिः ॥ २॥
स जयति रामानुजयतिः
अजयति परवादिनं यदीयोक्तिः ।
सञ्जयति बोधमनघं
रञ्जयति बुधान् व्यथां च भञ्जयति ॥ ३॥
ते मीमांसाशास्त्र-
प्रमथनपरिकलितबुधजनानन्दाः ।
लक्ष्मणमुनेः प्रबन्धाः
लक्ष्मणपूर्वजशरा इव जयन्ति ॥ ४॥
रामानुजाय गुरवे नरवेषभाजे
शेषाय धूतकलये कलये प्रणामान् ।
यो मादृशानपि कृशान् परिपातुकामः
भूमाववातरदुदञ्चितबोधभूमा ॥ ५॥
रामानुजौ यामुनतीर्थसेवा-
परावुदीतौ नरकं निरोद्धुम् ।
तयोः पुराणः प्रणिनाय गीतां
तस्या नवीयस्तु ततान टीकाम् ॥ ६॥
यामुनतीर्थाश्रमिणौ
रामानुजमुनिर्मुकुन्दश्च ।
आद्यं त्रिवेणुधरमधिकं
अन्यदन्ताद्यमेकवेणुधरम् ॥ ७॥
नित्यं हेयगुणावधूननपराः नैर्गुण्यवादाः श्रुतौ
मुख्यार्थाः सगुणोक्तयः शुभगुणप्रख्यापनात् ब्रह्मणः ।
अद्वैतश्रुतयो विशिष्टविषयाः निष्कृष्टरूपाश्रया
भेदोक्तिः तदिहाखिलश्रुतिहितं रामानुजीयं मतम् ॥ ८॥
जयतु जगति लक्ष्मणार्यपक्षः
जयतु वचः श्रुतिमौलिदेशिकानाम् ।
जयतु निगमवर्त्मनिस्सपत्नं
जयतु चिराय च मूर्तिरञ्जनाद्रौ ॥ ९॥
(विश्वगुणादर्शचम्पूतः)
इति श्रीवेङ्कटाध्वरिगुरुभिरनुगृहीताः श्रीरामानुजवर्णनाश्लोकाः ।
॥ श्रीमते वेङ्कटाध्वरिणे नमः ॥
Proofread by Aruna Narayanan