श्रीरामकृष्णानन्दस्तुतिः
रामकृष्णानन्द-रामकृष्णयोरुभयोः स्मृतिः ।
पुनाति चित्तं सन्मार्ग प्रवृत्तिं वितनोति च ॥ १॥
श्रीरामकृष्णांशजनिं स्वकीयां नाम्नैव न स्वाचरणैरपीह ।
लोके जनानां प्रकटां विधाय श्रीरामकृष्णः स्वपदं जगाम ॥ २॥
श्रीरामभद्रस्य यथाञ्जनेयस्तथास्य सच्छिष्यगणेषु कश्चित् ।
भक्तः किलासीच्छशिनामधेयः शीलेन वृत्तेन च माननीयः ॥ ३॥
श्रीरामकृष्णं परमहंसमाप्त्वा तदीय दृष्ट्या विवशीकृतात्मा ।
तत्पादसेवां विविधां विधाय छायात्मतामस्य जगाम चासौ ॥ ४॥
सर्वेषु भूतेषु च तुल्यदृष्टिः शास्त्रार्थसम्पादनसक्तचितः ।
श्रीशारदाश्लाघित सच्चरित्रो नामापि लेभे स्वगुरोः पवित्रम् ॥ ५॥
अधीतबोधाचरणप्रचारैराचार्यभावं समुपेयिवांसम् ।
श्रीरामकृष्णाभिमतं विशुद्धं जितेन्द्रियं बुद्धिमतां वरिष्ठम् ॥ ६॥
स्वाचार्यसिद्धान्तनिविष्टचित्तं निरीक्ष्य तं सद्गुण सन्निधानम् ।
तन्मित्रवर्गाग्रसरो विवेकानन्दाभिधः प्राप मुदं प्रकृष्टाम् ॥ ७॥
चेतोहरां चेन्नपुरीति लोके विख्यातनाम्नीं नगरीं कदापि ।
तं प्रेषयामास हि रामकृष्णराद्धान्तसारं प्रकटं विधातुम् ॥ ८॥
शान्त्या च दान्त्या च तितिक्षया च गुरौ च भक्त्यामलयापि मत्या ।
सम्मानितः सर्वविदां समाजैः क्रमेण स ख्यातिमिह प्रपेदे ॥ ९॥
मयूरपुर्यां महिते प्रदेशे साह्येन केषामपि सज्जनानाम् ।
स्वावासमेकत्र मित प्रकल्प्य विद्यालयं कल्पयति स्म कञ्चित् ॥ १०॥
नरेन्द्रसङ्कल्पितमर्थजातं सम्प्राद्यमद्राख्यपुरे समग्रम् ।
स्थानं स्वकीयं पुनरेत्यज पश्चात् तत्या योगेन तनुं स्वकीयाम् ॥ ११॥
मङ्गलं रामकृष्णाय परमहंसस्वरूपिणे ।
कारुण्यसिन्धवे लोकबन्धवे विजितात्मने ॥ १२॥
सौजन्यनिधये रामकृष्णानन्दाय धीमते ।
दीनानामवने बद्धदीक्षायाह्यस्तु मङ्गलम् ॥ १३॥
इति श्रीवी० आर० कल्याणसुन्दरशास्त्रिविरचिता
``श्रीरामकृष्णानन्दस्तुतिः'' समाप्ता ।
प्रणाममन्त्रः-
रामकृष्णगतप्राणं हनुमद्भाव भावितम् ।
नमामि स्वामिनं रामकृष्णानन्देति संज्ञितम् ॥
Proofread by Aruna Narayanan