Shri Ramakrishna mangalashasanam

 श्रीरामकृष्णमङ्गलाशासनम् 
मङ्गलं देशिकेन्द्राय यमिनां चक्रवर्तिने ।
पराशक्तिस्वरूपिण्यै देव्यै भवतु मङ्गलम् ॥ १॥

सत्यसन्धस्य भक्तस्य क्षुदिरामस्य सूनवे ।
गदाधराय मेदिन्यामवतीर्णाय मङ्गलम् ॥ २॥

गदाधरसुनाम्ने च भक्त्यावेष्टितचेतसे ।
अनादृतान्यविद्याय मङ्गलं ब्रह्मचारिणे ॥ ३॥

भवतारणदक्षायाः सन्निधौ दक्षिणेश्वरे ।
अपूर्व कालिका पूजा निरतायास्तु मङ्गलम् ॥ ४॥

मथुरानाथविश्वास सेवानिर्वृतचेतसे ।
तपश्चरणशीलाय योगीशायास्तु मङ्गलम् ॥ ५॥

साधकव्याजसन्दिष्ट सर्वाम्नाय सुवर्त्मने ।
सर्वतन्त्रस्वतन्त्राय नित्यसिद्धाय मङ्गलम् ॥ ६॥

तपसि ब्रह्मचर्ये च या स्वस्य सहधर्मिणी ।
तस्याः श्री शारदादेव्या भर्त्रे भवतु मङ्गलम् ॥ ७॥

तोतापुरीयती प्राप्त चरमाश्रमहेतुके ।
समाधौ निर्विकल्पाख्ये सुदीर्घस्थाय मङ्गलम् ॥ ८॥

स्थिताय मातुरादेशात् जगदुद्धारकारणात् ।
पूर्णाऽन्तस्थितौ भावमुखे भवतु मङ्गलम् ॥ ९॥

पश्यते मातरं स्त्रीषु मृत्पिण्डं काञ्चनं तथा ।
सर्वभूतेषु च ब्रह्म मायातीताय मङ्गलम् ॥ १०॥

सदारोऽपि विरक्तानां यतीनां पुरतस्तु यः ।
सदाशिवस्वरूपाय तस्मै भवतु मङ्गलम् ॥ ११॥

ब्रह्मानन्दादिसच्छिष्य गणपूज्यपदाय ते ।
तेषु दीप्तात्मबोधाय परमहंसाय मङ्गलम् ॥ १२॥

गर्जद्वेदान्तसिंहेन विवेकानन्दरूपिणा ।
अपास्तनिद्रा भूर्येण कारिताऽस्मै च मङ्गलम् ॥ १३॥

संसारसागरोत्तार सेतु भूताङ्घ्रि रेणवे ।
गुरवे सर्वलोकानां रामकृष्णाय मङ्गलम् ॥ १४॥

``ॐ स्थापकाय च धर्मस्य सर्वधर्मस्वरूपिणे ।
अवतारवरिष्ठाय'' रामकृष्णाय मङ्गलम् ॥ १५॥

मङ्गलं गुरुदेवाय देव्यै मात्रे च मङ्गलम् ।
मङ्गलं भक्तवृन्देभ्यः सर्वलोकाय मङ्गलम् ॥ १६॥

इति स्वामिअचलानन्दसरस्वतीविरचितं
           ``श्रीरामकृष्णमङ्गलाशासनम्'' सम्पूर्णम् ।

Proofread by Aruna Narayanan