श्रीरामकृष्णपञ्चकम्
विधीनां श्रौतानामनियमगते संहततया,
न सम्प्राप्याधारं क्वचिदपि सखेदं लयजुषाम् ।
इदानीन्त्वामेकं सहजविषयं संस्कृतमतिं
किमेतत् संश्रित्य प्रियमिव हितं जन्मसफलम् ॥ १॥
निषेधास्ते सर्वे विलसदभयाकुण्ठितधियो
विशेषान् पापांस्ताननृजुमनुजानत्र कलिजान् ।
समाश्रित्यामत्ताः प्रकटितजया धिक्कृतजना,
अहो रामं कृष्णं सचकितमेवेत्यातिविजिताः ॥ २॥
तितिक्षा त्यागोऽसौ शमदमसमाध्यभयताः,
क्षमा शान्तिर्भक्तिः सहचरतया ज्ञानमतिगम् ।
प्रसिद्धं वैराग्यं मणिललनयोः सत्यपरता,
तनौ दिव्यायां ते युगपदतिलोभात्किमवसन् ॥ ३॥
किमुन्मत्तो मूर्खस्तव गुणगरिम्नः स्तवमिमं
पिशाचार्तः कर्तुं सितशशिधृतौ बाल इव वा ।
क्षमार्होऽयं दासः सहजकृपया नाथ निरतो
विवेकानन्दानामपि दुरवगाह स्वरमण ॥ ४॥
त्वमेकोऽद्वैतस्त्वं त्वमपि सकलोनिष्कल इति,
त्वमाराध्यो देवः शरणमिह दीनस्य कृतधीः ।
प्रियस्त्वं सर्वेषां स्मरणमननैकाधिकरणम्
नमो भूयस्तुभ्यं सुकृतनिकराणां प्रतिकृते ॥ ५॥
इति ब्रह्मचारिमेधाचैतन्यविरचितं ``श्रीरामकृष्णपञ्चकम्'' सम्पूर्णम् ।
Proofread by Aruna Narayanan