Shri Sarada Navakam

श्रीसारदानवकम्

सर्व सौभाग्य-सन्दोहे ब्रह्मानन्द-पयस्विनि । रामकृष्णार्चिते शुद्धे सारदे त्वां नमाम्यहम् ॥ १॥ विवेकानन्दसन्ध्येयां क्षमारूपां तपस्विनीम् । सारदां दिव्यभूषां त्वां नारायणि स्मराम्यहम् ॥ २॥ माहेशि महदाराध्ये चित्प्रेमानन्दसम्प्रदे । सारदे जगतामाद्ये नारायणि नमोऽस्तुते ॥ ३॥ महापुरुषसंसेव्ये हंसेश्वरि सुमङ्गले । शिवानन्दप्रदे मातः सारदे त्वामहं भजे ॥ ४॥ सारदानन्दसम्पूज्ये वरेण्ये सारदायिके । प्रसन्नवदनाम्भोजे सारदे त्वां नतोऽस्म्यहम् ॥ ५॥ विमले कमले सीते शारदे सारदे शिवे । कलिकल्मषपापघ्ने कात्यायनि नमोऽस्तुते ॥ ६॥ यतिसङ्घसमाराध्ये यतिसङ्घ-सुहासिनि । तत्सङ्घत्राणदात्री त्वं सारदे त्वां नता वयम् ॥ ७॥ सारदे वरदे मातर्ब्रह्मशक्ति सनातनि । निष्कलङ्क-सुचरित्रं भक्तिमन्तं कुरुष्व माम् ॥ ८॥ सर्वोत्कृष्ट-गुणाधारे गुणाढ्ये सर्वसाधिके । शरण्ये सारदे दुर्गे नारायणि नमोऽस्तुते ॥ ९॥ (जय) नारायणि नमोऽस्तु ते, नारायणि नमोऽस्तु ते । नारायणि नमोऽस्तु ते, नारायणि नमोऽस्तु ते ॥ इति श्रीसारदानवकं सम्पूर्णम् । Proofread by Aruna Narayanan