Savitrikrita Yama Stuti 2

 सावित्रिकृता यमस्तुतिः २ 

सावित्र्युवाच ।
धर्माधर्मविधानज्ञ सर्वधर्मप्रवर्तक ।
त्वमेव जगतो नाथः प्रजासंयमनो यमः ॥ १॥

कर्मणामनुरूपेण यस्माद्यमयसे प्रजाः ।
तस्माद्वै प्रोच्यसे देव यम इत्येव नामतः ॥ २॥

धर्मेणेमाः प्रजाः सर्वा यस्माद्र ञ्जयसे प्रभो ।
तस्मात्ते धर्मराजेति नाम सद्भिर्निगद्यते ॥ ३॥

सुकृतं दुष्कृतं चोभे पुरोधाय यदा जनाः ।
त्वत्सकाशं मृता यान्ति तस्मात्त्वं मृत्युरुच्यसे ॥ ४॥

कालं कलार्धं कलयन्सर्वेषां त्वं हि तिष्ठसि ।
तस्मात्कालेति ते नाम प्रोच्यते तत्त्वदर्शिभिः ॥ ५॥

सर्वेषामेव भूतानां यस्मादन्तकरो महान् ।
तस्मात्त्वमन्तकः प्रोक्तः सर्वदेवैर्महाद्युते ॥ ६॥

विवस्वतस्त्वं तनयः प्रथमः परिकीर्तितः ।
तस्माद्वैवस्वतो नाम्ना सर्वलोकेषु कथ्यसे ॥ ७॥

आयुष्ये कर्मणि क्षीणे गृह्णासि प्रसभं जनम् ।
तदा त्वं कथ्यसे लोके सर्वप्राणहरेति वै ॥ ८॥

तव प्रसादाद्देवेश त्रयीधर्मो न नश्यति ।
तव प्रसादाद्देवेश धर्मे तिष्ठन्ति जन्तवः ।
तव प्रसादाद्देवेश सङ्करो न प्रजायते ॥ ९॥

सतां सदा गतिर्देव त्वमेव परिकीर्तितः ।
जगतोऽस्य जगन्नाथ मर्यादापरिपालकः ॥ १०॥

पाहि मां त्रिदशश्रेष्ठ दुःखितां शरणागताम् ।
पितरौ च तथैवास्य राजपुत्रस्य दुःखितौ ॥ ११॥

इति मत्स्यपुराणे त्रयोदशाधिकद्विशततमाध्यायान्तर्गता
             सावित्रिकृता यमस्तुतिः समाप्ता ।

मत्स्यपुराण । अध्याय २१३/१-११॥


matsyapurANa . adhyAya 213/1-11..

Proofread by PSA Easwaran