Shri Sharadadevi Stotram

 श्रीशारदादेवीस्तोत्रम् 
या देवी मर्त्यदेहेऽमरगण-विरल-ज्योतिषा दीप्यमाना
      यस्याः पुण्य प्रभावैरगणित-मनुजा दर्शिता मुक्तिमार्गम् ।
यस्याः पीयूषवाणी निखिल-तनुभृतां सर्वसन्ताप-हन्त्री
      श्री माँ-रूपेण नृणां नियत-हितकरीं शारदां तां नमामि ॥ १॥

पत्युः स्थानं व्रजन्ती स्वजन-परिहृता प्रान्तरे भीमदस्यूं
      ``कन्याऽहं शारदा ते त्वमसि मम पिता रक्षणीया त्वयाऽहम् ।''
इत्युक्त्वा दस्युचित्तं कुलिश-सुकठिनं कोमलं या चकार
      श्री माँ-रूपेण मह्यां धृततनुमभयां शारदां तां नमामि ॥ २॥

त्यक्त्वा भोगस्य मार्गं पतिगत-हृदया तद्व्रते चैकनिष्ठा
      पूर्णं कर्तुं व्रतं तद् विगलित-चिकूरा मातृभावाश्रिता या ।
पत्युः पूजामगृह्णाज्जगति निरुपमां षोडशी सिद्धिदात्री
      श्री माँ-ख्यां विश्ववन्द्यां गिरिवर-तनयां शारदां तां नमामि ॥ ३॥

भक्तानां मातृरूपां सततमभयदां सर्वकल्याणकामां
      पत्यूरुग्णस्य सेवामनलस-मनसा कुर्वतीं क्लान्तिहीनाम् ।
आतिथ्ये मुक्तहस्तां सुनिपुण-गृहिणीमब्धि जाता-स्वरूपां
      श्री माँ-ख्यां विश्वरूपामभिमत-वरदां शारदामर्चयामि ॥ ४॥

लब्ध्वा मातृत्व-सम्पद्-बहुसुकृतिफलं योषितः पूर्णकामा-
      स्तस्मात् सन्तानचिन्ता मनसि समुदिता सा तु तत्रैव लीना ।
सङ्ख्यातीतान् सुपुत्रान् निज-तनुज-निभान् प्राप्य यासीत्कृतार्था
      कल्याणीं शुद्धसत्त्वां जनगणजननी शारदां तां नमामि ॥ ५॥

प्रणत-हृदयपद्म-न्यस्तपादाब्जयुग्मा
      मधुरवचनगर्भां बिभ्रती कण्ठवीणाम् ।
रुचिरविमलकान्तिर्ज्ञानभक्तिप्रदात्री
      निखिलभुवन पूज्या शारदा शारदैव ॥ ६॥

जयतु जयतु देवी ध्यानगम्भीरमूर्ति-
      र्जयतु जयतु देवी साधकाभीष्टदात्री ।
जयतु जयतु देवी रामकृष्णस्य शक्ति-
      र्जयतु जयतु देवी शारदा विश्वधात्री ॥ ७॥

वैकुण्ठे विष्णु पार्श्वे विहरति कमला विश्वकल्याणदात्री
      कैलाशे शम्भुवासे विहरति गिरिजा लोकरक्षा-विधात्री ।
जाह्नव्यां पुण्यतीर्थे मणिमय-भवने कालिका-पादपद्मे
      राजते ध्यानमग्नौ मम हृदयनिधौ शारदा-रामकृष्णौ ॥ ८॥

इति श्रीकालीपदबन्द्योपाध्यायविद्याविनोदेनविरचितं 
            ``श्रीश्रीशारदादेवीस्तोत्रम्'' सम्पूर्णम् ।

Proofread by Aruna Narayanan