Shri Sharada Devi Stotram

 श्रीशारदादेवीस्तोत्रम् 
ॐ ह्रीं विशुद्धां प्रकृतिस्वरूपां
      आधारभूतां जगदादिशक्तिम् ।
दयास्वरूपां जगदात्मिकां वै
      श्री शारदां त्वां प्रणमामि नित्यम् ॥ १॥

साङ्ख्यैश्च वेदैरपि सर्वशास्त्रैः
      ज्ञेया न माता परमासि माया ।
तव प्रसादाद्विदिता भवेस्त्वं
      प्रसीद देवेशि गतिस्त्वमेका ॥ २॥

रक्ताम्बरा त्वं जगदम्बिका वै
      त्वं वेदमूर्तिर्भुवि विश्वधात्री ।
सृष्टेः स्थितेश्च प्रलयस्य कर्त्री
      पदाम्बुजं मे तव देहि मातः ॥ ३॥

दात्रीं जनेभ्यो भवबन्धमुक्ते-
      रनन्तवीर्यां शशिसूर्यनेत्राम् ।
आब्रह्मलोकाः प्रणमन्ति यां तां
      नमाम्यहं शारदशारदाम्बाम् ॥ ४॥

देवीं हि शम्भोः परमस्य विष्णोः
      प्रियां च सीतां रघुनन्दनस्य ।
श्री शारदां वा अवतारमुख्य
      श्री रामकृष्णस्य नमामि भूयः ॥ ५॥

ब्यैक्षन्त सिद्धा स्तव शक्तिमन्त्रं
      तेजोमयं यं हि तपोभिरुग्रैः ।
तमेव नृणां भव मोक्षसेतुं
      जाने तु नाहं शरणागतस्ते ॥ ६॥

नक्तन्दिवं यद् यतयोऽपि देवाः
      सिद्धादिसङ्घास्तव पादपद्मम् ।
ध्यायन्ति गायन्ति नमन्ति नित्यं
      दिव्यं पदं तद्विनयेन याचे ॥ ७॥

मोहान्धकारेऽति ममत्वगर्ते
      भ्रष्टोऽस्मि मातः परिपाहि मां त्वम् ।
श्री रामकृष्ण-प्रकृति-स्वरूपे
      श्री शारदे त्वां शरणं प्रपद्ये ॥ ८॥

देवि प्रसीद प्रणतार्तिहन्त्री
      प्रसीद मातः परमेश्वरि त्वम् ।
प्रसीद देवेशि सदा प्रसीद
      प्रसीद विश्वेश्वरि पाहि नस्त्वम् ॥ ९॥

ॐ दुस्तारार्णव संसारे नृणामेको गतिर्हि या ।
तस्यै तु शारदादेव्यै शिवायै च नमो नमः ॥ १०॥

इति ब्रह्मचारिबादलेनविरचितं ``श्रीश्रीशारदादेवीस्तोत्रम्'' सम्पूर्णम् ।

Proofread by Aruna Narayanan