Shri Sharada Devi Suprabhatam

 श्रीशारदादेवीसुप्रभातम् 
मातः समस्तजगतां परमस्य पुंसः
      शक्तिस्वरूपिणि शिवे करुणार्द्रचित्ते ।
लोकस्य शोकशमनाय कृतावतारे
      श्रीशारदेऽस्तु शिवदे तव सुप्रभातम् ॥ १॥

बालो भवस्य तमसः परिहारयित्रे
      लीलामनुष्यवपुषेऽथ गदाधराय ।
दत्ते तदर्पितधियाऽप्तसमस्तविद्ये
      श्रीशारदेऽस्तु शुभदे तव सुप्रभातम् ॥ २॥

बाल्यात् परे वयसि भर्तरि सम्प्रवृत्ता-
      मुन्मत्त इत्यनुचितामवधूय वार्ताम् ।
तद्दर्शनक्रमितदुर्गमदूरमार्गे
      श्रीरामकृष्ण दयिते तव सुप्रभातम् ॥ ३॥

संन्यासितं पतिमवेक्ष्य च नोद्विजाने
      सेवार्पितत्रिकरणे परिशुद्धचित्ते ।
तत्साधनाचरमसीम्नि समर्पिताङ्घ्रे
      श्रीरामकृष्ण परमेश्वरि सुप्रभातम् ॥ ४॥

यामेव चात्मजननीं भवतारिणीं च
      सेवापरां तु बुबुधे गुरुरस्तभेदः ।
तस्याः समस्तजगतोऽस्य शरण्यमूर्तेः
      श्रीरामकृष्ण दयिते तव सुप्रभातम् ॥ ५॥

आवृण्वती परमिकां प्रकृतिं स्वकीयां
      संसारिणीव बहुदुःखजले भवाब्धौ ।
सर्वं सहे श्रितजनोद्धरणैकदीक्षे
      श्रीरामकृष्णदयिते तव सुप्रभातम् ॥ ६॥

गेहस्य मार्जनविधौ मम कर्मशान्तिं
      नायात्यसङ्ख्य भुजनिष्क्रियमाणमेवम् ।
आकस्मिकोक्तिविवृताखिलशक्तिरूपे
      श्रीरामकृष्णदयिते तव सुप्रभातम् ॥ ७॥

श्रीरामकृष्णदयिते त्वदधीनसत्त्वे
      त्वद्भक्तवृन्दपरिपालिनि मुक्तिदात्रि ।
त्वद्भावरक्तहृदये त्वदभिन्नतत्त्वे
      मातः समस्त जगतां तव सुप्रभातम् ॥ ८॥

इति स्वामिअचलानन्दसरस्वतीप्रणीतं ``श्रीश्रीशारदादेवीसुप्रभातम्'' सम्पूर्णम् ।

Proofread by Aruna Narayanan