Shri Sharada Devi Ashtakam

 श्रीशारदादेव्यष्टकम् 
शारदा वरदा पुण्या सुदिव्यज्योतिर्मण्डिता ।
सार्धं श्रीरामकृष्णेन हृदये मम तिष्ठतु ॥ १॥

या शारदा मर्त्यमलं करोति
      ज्ञानप्रदा सैव सरस्वती हि ।
ध्येया सदा सा भवभञ्जनाय
      ज्ञेया भवानी जननीति नित्यम् ॥ २॥

इत्थं स्तवैः श्रीप्रभु-रामकृष्णो
      यामर्चयामास शुभां वरेण्याम् ।
मायावृतां भस्मनिगूढ़ वह्निं
      सा मङ्गला मङ्गलमातनोतु ॥ ३॥

सेवा परं पङ्कजपाणियुग्मं
      श्रीरामकृष्णाय च दत्तचित्तम् ।
यस्याः प्रसन्नास्यसुहास्यबिम्बं
      नित्यं जने सा करुणां दधातु ॥ ४॥

लज्जावगुण्ठनवती पतिगेहलक्ष्मीः
      सा षोडशीति ललनासु ललामभूता ।
पूजामगृह्णदभया सदया स्वपत्युः
      मग्ना समाधि जलधौ खलु भावलीना ॥ ५॥

या घोषितार्चन परैस्तु नरेन्द्रमुखैः
      कालीति कल्मषहरीति जननी च साक्षात् ।
प्रत्यक्षगम्यपरमाद्भुतमूर्तरूपा
      सद्यो भयं हरतु सा भवभीतिभीरोः ॥ ६॥

तेजः पुञ्जतपः प्रभावविभया देदीप्यमाना सदा
      हस्ताब्जे जपमालिकां धृतवती कल्याणयज्ञे रता ।
शश्वद्भक्तजने त्वनुग्रहकरी पुण्यप्रदा मोक्षदा
      गङ्गातोयसमा प्रसादनिलया श्री शारदा पातु नः ॥ ७॥

लोलादेहधरी सदा सहचरी श्री रामकृष्णस्य या
      देवेशस्य युगप्रयोजनवशात् साक्षात् जगद्धात्रिका ।
धर्मस्थापनहेतवे धृतवपुर्नेतुं जनान् सत्पथं
      भक्तिं मोक्षफलं सकृद् वितरितुं साम्बा प्रसीदत्वहो ॥ ८॥

इति अध्यापिका डाॅ (कुमारी) कृष्णा बन्द्योपाध्याया (एम. ए. (डबल) पी-एच। डी.) 
            विरचितं ``श्रीश्रीशारदादेव्यष्टकम्'' सम्पूर्णम् ।

Proofread by Aruna Narayanan