Shri Sharada Devi Ashtakam

 श्रीशारदादेव्यष्टकम् 
न याचे समृद्धिं न चानित्यमायु-
      र्न रूपं न धर्मं यशो वा समित्रम् ।
अधर्मं न कार्यं न दैन्यं दिवं वा
      मतिर्मे तु भूयात् पदे शारदायाः ॥ १॥

स्वदेशे विदेशे भव त्वं दयार्द्रा-
      त्वनीचे सुनीचे समाना विधात्री ।
जले वा भुवि त्वं प्रजानां शरण्या
      नमस्ते नमस्ते पदे शारदायाः ॥ २॥

अजस्रं यथा ते भजाम्यङ्घ्रि युग्मं
      यथा नाम तेऽहं जपामि सचिन्त्यः ।
अपूर्वान् गुणांस्ते स्मरामि प्रहृष्ट-
      स्तथा शारदा त्वं विधेहि प्रसन्ना ॥ ३॥

वृथैव प्रयाति क्षणं मे वरेण्ये !
      त्विदानीं प्रबोधो न जातस्त्रिनेत्रे ! ।
यदा शारदा त्वं ममासि प्रपद्या
      भयं किं यमात् स्यान्नमः शारदायै ॥ ४॥

अहो कः शुभोऽयं प्रवृत्तोऽस्ति कालो
      यतः शारदाम्बागताऽस्यां धरित्र्याम् ।
विचिन्त्य नरास्तां लीलां पवित्रा
      ममर्त्या भवन्त्वप्रमत्ता भवन्तः ॥ ५॥

यथा जानकी सा सरामा समर्च्या
      ह्यसौ राधिका वा सकृष्णा नमस्या ।
सती सा सशम्भुर्यथाराधनीया
      तथा शारदा मे सरामासकृष्णा ॥ ६॥

रविस्त्वं शशी त्वं त्वमिन्द्रो यमस्त्वं
      प्रचेतास्त्वमग्निर्विराझत्मनास्याः ।
भयानां भयं त्वं करालापि काली
      धुनीते मनो मे कथं त्वाऽभिवन्दे ॥ ७॥

न कोऽप्यस्ति सत्यं मदीयो बिना त्वां
      विषाक्ते द्वितीये गतिर्यो भवाब्धौ ।
असङ्ख्यानि जन्मानि सन्त्वम्बिके मे
      सदा चेत् स्मरामि त्वदीये पदाब्जे ॥ ८॥

वृथा शब्दं परित्यज्य वद जिह्वे निरन्तरम् ।
शारदे शारदे मातः जयानन्दमयीति च ॥

इति पं. श्रीदीनानाथत्रिपाठी काव्य-व्याकरण-न्याय-तर्क-साङ्ख्य- 
      वेदान्ततीर्थ-विरचितं ``श्रीश्रीशारदादेव्यष्टकम्'' सम्पूर्णम् ।

Proofread by Aruna Narayanan