Shri Sharadamanidashakam

श्रीशारदामणिदशकम्

मानुषीं तनुमाश्रित्य लोकोद्धारविधायिनीम् । पतिलीलासहायां च वन्दे तां शारदामणिम् ॥ १॥ नारायणे यथा लक्ष्मीर्यथा गौरी च शङ्करे । रामकृष्णे तथा याम्बा वन्दे तां शारदामणिम् ॥ २॥ धरित्रीव सहिष्णुर्या स्पन्दक्षोभादिवर्जिता । स्वात्माभासनिरोधा च वन्दे तां शारदामणिम् ॥ ३॥ पतिप्रिया पतिप्राणा पतिसेवातिशोभना । पतिध्यानपरा या वै वन्दे तां शारदामणिम् ॥ ४॥ पतिशिक्षा प्रमोदा या ज्ञानभक्ति समुच्चिता । सर्वार्थसाधिका देवी वन्दे तां शारदामणिम् ॥ ५॥ अम्बा या भक्तशिष्याणां जगदम्बा समासदा । वराभयामृतस्यन्दा वन्दे तां शारदामणिम् ॥ ६॥ स्वान्तःस्था शास्त्रमर्मज्ञा आबाल्यब्रह्मचारिणी । पाखण्डोपाधिविध्वंसा वन्दे तां शारदामणिम् ॥ ७॥ सदाशान्ताब्धिसङ्काशा सदा प्रबोधमालिका । सदा सत्यविधात्री या वन्दे तां शारदामणिम् ॥ ८॥ दीनार्त्तदुःखहा माता कृपया परया युता । अबोधं रक्ष सन्तानं मायाचक्रविभेदतः ॥ ९॥ अद्य ते पुण्यजन्माहः स्मरन् मातृ-सुगौरवम् । पादेऽत्र प्रार्थनां देवि ! प्रीत्या सावहिता श‍ृणु ॥ १०॥ इति श्रीआत्मप्रज्ञविरचितं ``श्रीश्रीशारदामणिदशकम्'' सम्पूर्णम् । Proofread by Aruna Narayanan