Shri Sharadamanidevi Stuti

श्रीशारदामणिदेवीस्तुतिः

भुवनविमोहने शारदामणे सारन्देहिजगद्धात्रि । बेलूड़ स्थाने पुण्यप्रधाने चरणरेणुधनदात्रि ॥ १॥ गदाधरधर्म सुनिगूढ़मर्म पतिपूजनग्रहित्री । लज्जाऽवरणे प्रच्छन्नधने पापतापशोकहर्त्रि ॥ २॥ कामारपुकुर पूर्णलीलाधर चिरसाधनसङ्गिनी । त्रेताद्वापर -पूर्णावतार - ``रामकृष्ण'' -प्रपालिनी ॥ ३॥ कामिनीकाञ्चन त्यागवरण सर्वशक्ति-प्रदायिनी । तेलोभेलोवन दस्युप्रधान दुहितृ-पद-प्रार्थिनी ॥ ४॥ शारदानन्द विवेकानन्द ``आम्जाद'' समदर्शिनी । धर्ममध्यमणि निखिलपावनी त्रिभुवनजननी जननी ॥ ५॥ भारतमखिलं मातृपदबलं त्वं हि मातृशिरोमणिः । जगदम्बिका जयरामबाटिका दीन-गृह-प्रकाशिनी ॥ ६॥ ``गणय स्वीयं विश्वं सर्वं'' शेषवचः प्रचारिणी । ``प्रसूतिः सतामसतां च'' सर्वसुत संरक्षिणी ॥ ७॥ वर मातृपदे सुखदे वरदे यतेर्नतिकोटिजननि ! । विश्ववरेण्ये स्मरण सुपुण्ये जगदम्ब नारायणि ॥ ८॥ मातर्दिशिदिशि तवाशीराशि-र्वितरतु क्षेमं विधात्रि ! । यतीन्द्रविमले तापविह्वले कृपां वर्षय विश्वधात्रि ! । यतीन्द्रविमले मातृधनबले पदं निधेहि विश्वधात्रि ॥ ९॥ इति डाॅ श्रीयतीन्द्र विमलचतुर्धुरीणविरचिता ``श्रीशारदामणिदेवीस्तुतिः'' समाप्ता ॥ Proofread by Aruna Narayanan