Shri Shivananda Stotram

 श्रीशिवानन्दस्तोत्रम् 
लीलासहचरं नित्यमीश्वरस्य युगे युगे ।
शिवकल्पं शिवानन्दं भूयो भूयो नमाम्यहम् ॥ १॥

निर्विकल्प-समाधीप्सा बाल्यादेवाश्रयच्च तम् ।
त्यागमूर्तिं तितिक्षुं यं प्राप्य सिद्धिमिताऽचिरम् ॥ २॥

अलौकिकान् गुणान् दृष्ट्वा विवेकानन्दरूपिणा ।
``महापुरुष'' इत्याख्या यस्मै दत्ता निजेच्छया ॥ ३॥

भारतीयानि तीर्थानि परिक्रम्य स्वलीलया ।
सर्वत्रैवेश्वरं रूपं दृष्टवन्तं नमामि तम् ॥ ४॥

बहिर्यद् दृश्यते किं च सर्वं तदीश्वरात्मकम् ।
ईशातिरिक्तं नास्तीति मुक्तकण्ठं व्यघोषयत् ॥ ५॥

श्रीरामकृष्णदेवं श्रीशारदां जननीं तथा ।
विवेकानन्दमूर्तिं योऽपश्यद् हृदि निरन्तरम् ॥ ६॥

मुमुक्षूणामसङ्ख्यानामाध्यात्मिकजलं ददत् ।
न्यपूरयन्मनस्तृष्णां शिवानन्दं नमामि तम् ॥ ७॥

अनिर्वाणप्रदीपस्य शिखावत् सत्यविग्रहम् ।
शिवानन्दं सदा नौमि धर्ममार्ग प्रदर्शकम् ॥ ८॥

श्रीरामकृष्णसङ्घस्य द्वितीयं नायकं विभुम् ।
शिवकल्पं शिवानन्दमनन्तं प्रणमामि तम् ॥ ९॥

शिवानन्दस्य चरितं स्मरन्तः शुद्धमानसाः ।
ब्रह्मस्वरूपतामन्ते यान्ति नास्त्यत्र संशयः ॥ १०॥

इति अध्यापकपण्डित श्रीकुमुदरञ्जनगोस्वामीतर्कवेदान्ततीर्थविरचितं 
            ``श्रीमत्शिवानन्दस्तोत्रम्'' सम्पूर्णम् ।
प्रणाममन्त्रः-
शिवे यस्य पराभक्तिस्त्यागेऽपि रतिरुत्तमा ।
अहेतुककृपासिन्धुं शिवानन्दं नमाम्यहम् ॥


Proofread by Aruna Narayanan