श्रीश्यामदेवस्तवः
ॐ अस्य श्रीश्यामदेवस्तोत्रमन्त्रस्य ब्रह्मा ऋषिः ।
अत्यष्टिः (शिखरिणी) छन्दः । श्रीश्यामो देवता ।
सकलमनोरथसिद्ध्यर्थे श्रीश्यामदेवताप्रीत्यर्थे च जपे विनियोगः ।
शिवब्रह्मेन्द्राद्यैरखिलसुरवर्यैरिह सदा
मुनीन्द्रैः सिद्धेन्द्रैर्भृगुकपिलमुख्यैः स्तुतपदम् ।
दयायुक्तं नाथं नरकपतितोद्धारणपरं
भजेऽहं श्रीश्यामं भवभयहरं भक्तवरदम् ॥ १॥
महोत्साहं विष्णुं शुभशशिमुखं पद्मनयनं
किरीटाढ्यं कान्त्यावृततनुमनन्तं गुणनिधिम् ।
विना प्राक्पुण्योघैर्दुरधिगमनिःसीमविभवं
भजेऽहं श्रीश्यामं भवभयहरं भक्तवरदम् ॥ २॥
सदा वंशीवाद्यं सजलजलदाभं सुचरितं
मुदा गोपीगोपाद्यभयवरदं दुष्टदमनम् ।
बकीनाशं कृष्णं ह्यघवकतृणावर्तकरिपुं
भजेऽहं श्रीश्यामं भवभयहरं भक्तवरदम् ॥ ३॥
मनोज्ञं कंसारिं करिकुवलयापीडदमनं
हरिं रङ्गे यान्तं कठिनतरचाणूप्रशमनम् ।
स्वपित्रोरानन्दं ददतमधिकं प्रीतिजनकं
भजेऽहं श्रीश्यामं भवभयहरं भक्तवरदम् ॥ ४॥
मुदाभिर्नारीभिर्मदितनटनाट्यैकनिपुणं
क्वणत्काञ्चीकान्तिक्वणितसुखसङ्गीतकवरम् ।
शुभं तं कौशेयाम्बरधरमुदारं वनगतं
भजेऽहं श्रीश्यामं भवभयहरं भक्तवरदम् ॥ ५॥
सुकालिन्दीकूले घनतरतरौ स्वच्छरजसि
स्फुटज्जातीपद्मे सुरभिणि सदा कुञ्जनिलये ।
लसन्तं गोपीभिः शरदि सुरनारीभिरमलं
भजेऽहं श्रीश्यामं भवभयहरं भक्तवरदम् ॥ ६॥
पिबन्तं दावाग्निं शमनमखिलानां च विपदां
पदं तत्सौख्यानां प्रचुरतरकालीयदमनम् ।
हरन्तं सन्तापं व्रजजनवराणां सुतपसां
भजेऽहं श्रीश्यामं भवभयहरं भक्तवरदम् ॥ ७॥
सुशैलेन्द्रं हस्ते दधतमनिशं सप्तदिवसं
जनानां स्वीयानां विविधविपदां सङ्क्षयकरम् ।
गवां त्राणार्थं वै गिरिवरधरं नन्दतनयं
भजेऽहं श्रीश्यामं भवभयहरं भक्तवरदम् ॥ ८॥
सुरेशं गोविन्दं मणिकनकहाराङ्गदधरं
सुपिच्छापीडं कौस्तुभरुचिरवक्षःपरिसरम् ।
रमेशं लोकानां हितकरमलं विश्वजनकं
भजेऽहं श्रीश्यामं भवभयहरं भक्तवरदम् ॥ ९॥
चिदानन्दाकारं मुनिवरहृदि प्राप्तनिलयं
यजुःसामाथर्वप्रभृतिषु तथा ऋक्षु विदितम् ।
अचिन्त्यं दुर्बोधं प्रकृतिगुणयुक्तैश्च पुरुषै-
र्भजेऽहं श्रीश्यामं भवभयहरं भक्तवरदम् ॥ १०॥
स्तवः श्यामदेवस्य विष्णोर्मयाऽयं
कृतो दिङ्मितैः शुद्धभावेन पद्यैः ।
सुरामप्रसादाभिधानेन यायात्
पठेद्यो नरः श्यामदेवप्रसादम् ॥ ११॥
॥ इति श्रीश्यामदेवस्तवः सम्पूर्णः ॥
भगवान् श्रीश्यामदेव राजस्थान के अतिप्रसिद्ध देवता हैं
और लाखों घरों के कुलदेव, इष्टदेव हैं । श्रीश्यामदेव
को कथा संस्कृतसाहित्य के अनुपम निधि पुराणों में उपलब्ध
हैं। श्रीश्यामप्रभु की विस्तृत कथा महर्षि वेदव्यास-रचित
अष्टादश महापुराणों में से अन्यतम, प्रधान स्कन्द-पुराण के
कौमारिकाखण्ड में मिलती है । यह कथा पाँच अध्यायों (३४५
श्लोकों) में है, जो अतीव सुन्दर, रोचक एवं उपदेशप्रद है ।
इसके अतिरिक्त भारतसार में भी संक्षिप्त श्रीश्यामदेवकथा
दो अध्यायों (४६ श्लोकों) में किञ्चित् रूपान्तर से उपलब्ध होती है ।
Encoded and proofread by anonymous456an at gmail.com