Svami Abhedananda Ashtakam

स्वामिअभेदानन्दाष्टकम्

समाधियोगेन किशोरभूतस्त्वं सिद्धिमास्थाय विरक्तिमूलाम् । श्रीरामकृष्णस्य विशुद्ध पादान्तिकं गतोऽसि प्रविविक्तचेताः ॥ १॥ कालीतपस्वीति यशोंऽशुमाला विस्तीर्णतां श्रीभगवत्प्रियेषु । गता वतेयं धवला मनस्विस्थिता तव श्वेतमहोर्मितुल्या ॥ २॥ प्रतीच्यदेशेषु विवेकदेवैराकारितो द्वैधविहीनभावः । गतः प्रचारार्थमभयं त्वमेको वेदान्तधर्मस्य महता बलेन ॥ ३॥ श्रीरामकृष्णस्तवनं विरच्य प्राप्ता जनन्यास्त्ववचेयमाशीः । कण्ठे वसस्त्वस्य सरस्वती सा धन्यः प्रसादेन ततोऽम्बिकायाः ॥ ४॥ अद्वैततत्त्वाधिगमेन देव श्रीरामकृष्णस्य विशेषमारात् । माहात्म्यमेत्य क्रियते प्रचारस्त्वया स्म शुद्ध प्रभुदेव सत्यम् ॥ ५॥ सत्यश्चिदानन्दमयोऽयमात्माऽभेदोपलक्ष्यो यत एव तत्त्वम् । अन्वर्थनामा जगति प्रसिद्धस्त्वमेव मत्वाऽन्यदपास्य सर्वम् ॥ ६॥ नानागुणानां समुपाश्रयोऽपि ज्ञानैरनल्पैः समलङ्कृतस्त्वम् । शक्त्या महत्या विभूषितश्चाऽहङ्कारलेशे न विवर्जितात्मा ॥ ७॥ नमोऽस्तु राजगणार्चिताभ्यां लोकेऽपि दुर्दर्शसुदुर्लभाभ्याम् । विराजितारिव्यसनोपमाभ्यां भक्तैः समाराधितपद्युगाभ्याम् ॥ ८॥ इति ब्रह्मचारिमेधाचैतन्यविरचितं ``स्वामिअभेदानन्दाष्टकम्'' सम्पूर्णम् । प्रणाममन्त्रः-- शास्त्रज्ञाय प्रशान्ताय वेदान्तप्रतिपादिने । नमोऽस्त्वभेदपादाय ज्ञानविज्ञानदीप्तये ॥ Proofread by Aruna Narayanan