Tulasipriya Ashtakam

 तुलसीप्रियाष्टकम् 
मणिविग्रह हे बलभद्रसुर
मदमत्तविभो स्फुरणं मधुरम् ।
वदनं मधुरं हसनं मधुरं
तुलसीप्रिय ते भुवनं मधुरम् ॥ १॥

          अभिराममहेश्वर हे मधुर
          करुणावरुणालय हे विमल ।
          मधुरो महिमा मधुरा प्रतिमा
          तुलसीप्रिय ते भुवनं मधुरम् ॥ २॥

गौरो मधुरः सौरो मधुरः
पौरो मधुरः शस्त्रं मधुरम् ।
तीरं मधुरं चेलं मधुरं
तुलसीप्रिय ते कथनं मधुरम् ॥ ३॥

          ग्रीवा मधुरा भावो मधुरः
          केशो मधुरो रासो मधुरः ।
          हास्यं मधुरं लास्यं मधुरं
          तुलसीप्रिय ते  भ्रमणं मधुरम् ॥ ४॥

नलिनं मधुरं जघनं मधुरं
श्रोत्रे मधुरे नेत्रे मधुरे ।
पादौ मधुरौ नादो मधुर-
तुलसीप्रिय ते चलनं मधुरम् ॥ ५॥

          भोगो मधुरो योगो मधुरः 
          दासो मधुरो वासो मधुरः ।
          दृश्यं मधुरं स्पर्शं मधुरं
          तुलसीप्रिय ते सवनं मधुरम् ॥ ६॥

हाला मधुरा वेला मधुरा
नीलं मधुरं मूलं मधुरम् ।
मौलिर्मधुरो मालं मधुरं
तुलसीप्रिय ते शरणं मधुरम् ॥ ७॥

          गेयं मधुरं पेयं मधुरं
          चव्यं मधुरं चोष्यं मधुरम् ।
          लेह्यं मधुरं काव्यं मधुरं
          तुलसीप्रिय ते वचनं मधुरम् ॥ ८॥

इति प्रदीप्तनन्दशर्मविरचितं तुलसीप्रियाष्टकं सम्पूर्णम् ।

Composed, encoded, and proofread by
Dr. Pradipta Kumar Nanda, Kendrapara, Orisa pknanda65 at gmail.com