Uttangakritam Naga Stotram

उत्तङ्गकृतं नागस्तोत्रम्

य ऐरावतराजानः सर्पाः समितिशोभनाः । वर्षन्त इव जीमूताः सविद्युत्पवनेरिताः ॥ १३९॥ सुरूपाश्च विरूपाश्च तथा कल्माषकुण्डलाः । आदित्यवन्नाकपृष्ठे रेजुरैरावतोद्भवाः ॥ १४०॥ बहूनि नागवर्त्मानि गङ्गायास्तीर उत्तरे । इच्छेत्कोऽर्कांशुसेनायां चर्तुमैरावतं विना ॥ १४१॥ शतान्यशीतिरष्टौ च सहस्राणि च विंशतिः । सर्पाणां प्रग्रहा यान्ति धृतराष्ट्रो यदेजति ॥ १४२॥ ये चैनमुपसर्पन्ति ये च दूरं परं गताः । अहमैरावतज्येष्ठभ्रातृभ्योऽकरवं नमः ॥ १४३॥ यस्य वासः कुरुक्षेत्रे खाण्डवे चाभवत्सदा । तं काद्रवेयमस्तौषं कुण्डलार्थाय तक्षकम् ॥ १४४॥ तक्षकश्चाश्वसेनश्च नित्यं सहचरावुभौ । कुरुक्षेत्रे निवसतां नदीमिक्षुमतीमनु ॥ १४५॥ जघन्यजस्तक्षकस्य श्रुतसेनेति यः श्रुतः । अवसद्यो महद्द्युम्नि प्रार्थयन्नागमुख्यताम् ॥ १४६॥ करवाणि सदा चाहं नमस्तस्मै महात्मने ॥ १४६॥ इति महाभारते आदिपर्वणि ३ अध्यायान्तर्गतं उत्तङ्गकृतं नागस्तोत्रं सम्पूर्णम् । महाभारत । आदिपर्व । अध्याय ३/१३९-१४६॥ mahAbhArata . Adiparva . adhyAya 3/139-146.. Proofread by PSA Easwaran