श्रीवल्लभनामस्तोत्रम्
यत्प्रसादादनायासं सिध्यन्त्यर्था मनीषिणाम् ।
तन्निजाचार्यनामानि प्रवक्ष्यामि यथामति ॥ १॥
श्रीवल्लभः सदानन्दः सच्चिदानन्दविग्रहः ।
दैवोद्धारप्रयत्नात्मा प्राकट्यानन्ददायकः ॥ २॥
देवश्रीलक्ष्मणसुतः परमानन्दवर्धनः ।
श्रीमदिल्लमगारुप्राक् पुष्कलेन्दुरखण्डितः ॥ ३॥
चम्पारण्यवनस्थानाविर्भावानन्दकारकः ।
अग्निर्लीलाब्घिजनकः श्रीकृष्णास्यं कृपानिधिः ॥ ४॥
अद्भुतस्वीयशिशुताजनन्यानन्दकारकः ।
बाललीलातिसुखदो जनन्युत्सङ्गलालितः ॥ ५॥
परमोदारचरितो जनतारतिवर्धनः ।
स्वलीलाश्रवणात्यन्तशुद्धाशयवशंवदः ॥ ६॥
स्वयशोगानसंहृष्टहृदयाम्भोजविष्टरः ।
अतिसौन्दर्यनिकरप्राप्तकौमारशोभनः ॥ ७॥
पञ्चमाब्दोपनयनो गायत्रीव्रतधारकः ।
गुरुब्रह्मकुलावासज्ञापिताखिलसत्क्रियः ॥ ८॥
सकृन्निगदसम्प्राप्तसर्वविद्याविशारदः ।
महातेजः प्रकटनो महामाहात्म्यदर्शकः ॥ ९॥
सर्वरभ्यो भावगम्यः पितृकीर्तिविवर्धनः ।
ब्रह्मानन्दरसासक्ततातभक्तिपरायणः ॥ १०॥
भक्तिमार्गप्रचारार्थविद्यानगरपावनः ।
कृष्णदेवाख्यसद्राजसभाचरणधारकः ॥ ११॥
स्वरूपानन्तशोभाढ्यः सर्वलोककैकपावनः ।
स्वदर्शनसुधासिक्तराजसौभाग्यवर्धनः ॥ १२॥
अत्युत्तममणिव्रातहेमसिंहासनस्थितः ।
उग्रप्रतापः सर्वेशो नमन्नृपतिमण्डलः ॥ १३॥
अनेकभूतिशोभाढ्यश्चराचरनमस्कृतः ।
विद्वज्जनपरीवारमण्डितोऽखिलमण्डितः ॥ १४॥
अनल्पसङ्कल्पजल्पवादश्रवणसादरः ।
अनेकमतसन्देहनिराकर्ता निराकुलः ॥ १५॥
नवनीरदगम्भीरध्वनिरुल्लसिताखिलः ।
अखण्डपण्डितव्रातप्रोद्यत्पाखण्डखण्डनः ॥ १६॥
निवारिततमःपुञ्जजगदान्ध्यनिवर्तकः ।
मायावादनिराकर्ता सर्ववादनिरासकृत् ॥ १७॥
साकारब्रह्मवादैकस्थापको वेदपारगः ।
सर्वस्तुत्योऽभिसङ्गम्यो वेदमूर्तिः शिवङ्करः ॥ १८॥
व्रजयोत्सवसाद्यन्तदेवराजप्रसादकृत् ।
अत्यादरसमानीतकनकस्नानशोभितः ॥ १९॥
जयादिमङ्गलोद्घोषविद्वज्जनसमादृतः ।
अदेयदानदक्षश्च महोदारचरित्रवान् ॥ २०॥
पुण्डरीकवरेण्यश्रीविठ्ठलप्रेक्षणोत्सुकः ।
तद्दर्शनमहानन्दः प्राप्ताऽन्योन्यमनोरथः ॥ २१॥
चन्द्रभागोपकण्ठस्वस्थितितत्कीर्तिवर्धनः ।
पाण्डुरङ्गेशपरमोदारेक्षणकृतक्षणः ॥ २२॥
स्वानन्दतुन्दिलः पद्मदलायतविलोचनः ।
अचिन्त्यानन्तरूपः सन्मनुष्याकृतिरच्युतः ॥ २३॥
भक्तेच्छापूरकः सर्वाज्ञातलीलोऽतिमोहनः ।
स्वार्थोज्झिताखिलप्राणप्रियस्ताद्दशवेष्टितः ॥ २४॥
अनेकदेशसञ्चारपवित्रीकृतभूतलः ।
ध्वजवज्राङ्कुशादिश्रीकृतभूमिमहोत्सवः ॥ २५॥
त्रिलोकीभूषणं भूमिभाग्यं सहजसुन्दरः ।
भक्तिमार्गाङ्गशरणमन्त्रतत्त्वोपदेशकः ॥ २६॥
अन्याश्रयनिराकर्ता भक्तिक्षेत्रविशुद्धिकृत् ।
ब्रह्मसम्बन्धकृज्जीवसर्वदोषनिवारकः ॥ २७॥
पञ्चाक्षरमहामन्त्रविरहात्मफलप्रदः ।
पृथक्शरणमार्गोपदेष्टा श्रीकृष्णहार्दवित् ॥ २८॥
दिङ्मूढजनताभीतिनिवारणपरो गुरुः ।
भक्तरक्षार्थश्रीकृष्णभक्तिकृन्निखिलेष्टदः ॥ २९॥
स्वसिद्धान्तप्रबोधार्थानेकग्रन्थप्रवर्तकः ।
व्याससूत्राणुभाष्योक्तिवेदान्तार्थप्रकाशकः ॥ ३०॥
भक्तिमार्गाविरुद्धैकसिद्धान्तपरिशोधकः ।
जैमिनीयसूत्रभाष्यवक्ता वेदार्थदर्शकः ॥ ३१॥
वैयासजैमिनीयोक्तप्रमेयैकार्थ्यवित्तमः ।
पत्रावलम्बनकृतिर्वादिसन्देहवारकः ॥ ३२॥
काशीस्थलालङ्करणं विश्वेशप्रीतिकारकः ।
श्रीभागवततत्त्वार्थदीपप्राकट्यकारकः ॥ ३३॥
स्वान्तध्वान्तनिराकर्ता प्रकाशसुखदायकः ।
सच्चिदानन्दसन्दोहशास्त्रार्थविनिरूपकः ॥ ३४॥
मनोवाक्कायकर्तव्यसेवातत्त्वप्रकाशकः ।
मुख्यसिद्धान्तशुद्ध्यर्थसर्वनिर्णयदर्शकः ॥ ३५॥
प्रमाणादितत्त्वरूपपदार्थपरिशोधकः ।
भक्तिमार्गीयभगवत्सेवारीतिप्रकाशकः ॥ ३६॥
श्रीभागवतरूपाख्यप्रक्रियाविनिरूपकः ।
शास्त्रस्कन्धप्रकरणाध्यायार्थपरिशोधकः ॥ ३७॥
श्रीभागवतसारार्थनामसाहस्रदर्शकः ।
त्रिधालीलाप्रकाशश्रीकृष्णनामावलीप्रियः ॥ ३८॥
निरोधार्थानुसन्धानकृतेऽनुक्रमदर्शकः ।
कलिदोषाप्रवेशार्थकृष्णाश्रयनिरूपकः ॥ ३९॥
प्रतिबन्धनिरासार्थयमुनाष्टकदर्शकः ।
समस्तसिद्धान्तमुक्तावलीग्नन्थनिरूपकः ॥ ४०॥
सेवोपयिकसिद्धान्तरहस्यप्रतिपादकः ।
भक्तचिन्तानिरासार्थनवरत्नप्रकाशकः ॥ ४१॥
अन्तःकरणबोधोक्तिस्वीयशिक्षाप्रदर्शकः ।
कृष्णाङ्गीकारविषयोत्कटसन्देहवारकः ॥ ४२॥
सेवोत्कर्षप्रकाशार्थसेवाफलनिरूपकः ।
सेव्यनिर्धारसिद्ध्यर्थबालबोधप्रकाशकः ॥ ४३॥
सेव्यस्वरूपोत्कर्षार्थिमधुराष्टकदर्शकः ।
पुष्टिप्रवाहमर्यादामार्गत्रयविवेचकः ॥ ४४॥
सर्वेन्द्रियनिरोधार्थतल्लक्षनिरूपकः ।
बीजदार्ढ्यप्रकारेण भक्तिवर्धिन्युपायकृत् ॥ ४५॥
विवेकधैर्याश्रयकृद्बाहिर्मुख्यनिवारकः ।
सदसद्भावबोधार्थजलभेदनिरूपकः ॥ ४६॥
दुःसङ्गाभावसत्सङ्गकारकः करुणालयः ।
विरहानुभवार्थैकसन्न्यासाचारदर्शकः ॥ ४७॥
भजनावश्यकत्वार्थचतुःश्लोकीप्रकाशकः ।
यशोदोत्सङ्गललितप्रभुसेवैकतत्परः ॥ ४८॥
विस्फूर्जद्रासलीलादिरसामृतमहार्णवः ।
निर्दोषगुणरत्नाढ्यो भावान्तरमहोर्मिमान् ॥ ४९॥
कृष्णेन्दुविशदालोकपरमानन्दवर्धनः ।
स्वदासार्थकृताशेषसाधनः सर्वशक्तिधृक् ॥ ५०॥
प्रियव्रजस्थितिर्नित्यं व्रजनाथो व्रजार्तिभित् ।
व्रजीयजनजीवातुर्व्रजमाहात्म्यदर्शकः ॥ ५१॥
व्रजलीलाभावनात्मा श्रीगोपीजनवल्लभः ।
गोगोपगोपीषु प्रीतो गोकुलोत्सव उद्धवः ॥ ५२॥
गोवर्द्धनाद्रिप्रवरप्रेक्षणातिमहोत्सवः ।
गोवर्द्धनस्थित्युत्साहस्तल्लीलाप्रेमपूरितः ॥ ५३॥
शृङ्गद्रोणीकन्दरादिकेलीस्थानप्रकाशकः ।
द्रुमपुष्पलतागुल्मदर्शनप्रीतमानसः ॥ ५४॥
गह्वरप्रायदेशाढ्यगिरिकेलीकलोत्सवः ।
गोवर्द्धनाचलसखोऽनेकधाप्रीतिकारकः ॥ ५५॥
हरिदाससर्वसेवासादरो हार्दवित्तमः ।
गोवर्द्धनाचलारूढः स्मृताचलशिरोमणिः ॥ ५६॥
सन्मुखस्वागतश्रीमद्गोवर्धनधरः प्रियः ।
अन्योन्ययोजितकरो हसद्वदनपङ्कजः ॥ ५७॥
सूक्तिसारसुधावृष्टिस्वानन्दितव्रजाधिपः ।
श्रीगोवर्द्धनानुमतोत्तमाधिष्ठानकारकः ॥ ५८॥
प्रसन्नाम्बुजसङ्काशकलशानन्दिताखिलः ।
कुङ्कुमारुणरागातिविलक्षणरसप्रदः ॥ ५९॥
चतुर्दिग्दृष्टिमृगराड्बद्धस्थपनतत्त्ववित् ॥
सुदर्शननिरस्तातिप्रतिपक्षमहासुरः ॥ ६०॥
समुल्लसत्प्रेमपूरनानाध्वजवरप्रियः ।
निगूढनिजकुञ्जस्थमन्दिरस्थापितप्रभुः ॥ ६१॥
वृन्दावनप्रियतमो वृन्दारण्यपुरन्दरः ।
वृन्दावनेन्दुसेवैकप्रकारसुखदायकः ॥ ६२॥
कृष्णकुम्भनदासादिलीलापरिकरावृतः ।
गानस्वानन्दितश्रीमन्नन्दराजकुमारकः ॥ ६३॥
सप्रेमनवधाभक्तिप्रचाराचरणक्षमः ।
देवाधिदेवस्वप्रेष्ठप्रियवस्तूपनायकः ॥ ६४॥
बाल्यकौमारपौगण्डकैशोरचरितप्रियः ।
वशीकृतनिजस्वामीप्रेमपूरपयोनिधिः ॥ ६५॥
मथुरास्थितिसानन्दो विश्रामस्वाश्रमप्रियः ।
यमुनादर्शनानन्दो यमुनानन्दवर्धनः ॥ ६६॥
यमुनातीरसंवासरुचिस्तद्रूपवित्तमः ।
यमुनानन्तभावात्मा तन्माहात्म्यप्रदर्शकः ॥ ६७॥
अनन्यसेवितपदः स्वानन्यजनवत्सलः ।
सेवकानन्तसुखदोऽनन्यभक्तिप्रदायकः ॥ ६८॥
कृष्णाज्ञापालनार्थं स्वगृहस्थाश्रमदर्शकः ।
महालक्ष्मीप्राणपतिः सर्वसौभाग्यवर्धनः ॥ ६९॥
श्रुतिस्मृतिसदाचारपालनैकपरायणः ।
मर्यादास्थापनपरः कर्ममार्गप्रवर्तकः ॥ ७०॥
कर्मस्वरूपवक्ताऽनुष्ठानकृज्जनशिक्षकः ।
आधिदैविकसर्वाङ्गयज्ञकृद्यज्ञपूरुषः ॥ ७१॥
मूलमाहात्म्यबोधार्थविभूत्युत्कर्षपोषकः ।
ब्रह्मण्यदेवो धर्मात्मा सर्वधर्मप्रवर्तकः ॥ ७२॥
स्वाविर्भावितसन्मार्गप्रचारार्थस्ववंशकृत् ।
श्रीगोपीनाथजनको विश्वमङ्गलकारकः ॥ ७३॥
दयानिधिर्विभुश्रीमद्विठ्ठलप्रियपुत्रवान् ।
जन्मोत्सवमहोत्साहः स्मार्तसंस्कारसादरः ॥ ७४॥
प्रदर्शितनिजाचारः सर्वधर्मैकपालकः ।
स्वकीयापरमूर्तिः श्रीविठ्ठलेशकृतिप्रियः ॥ ७५॥
भाष्यादिशेषसम्पूर्तिपरमोत्कर्षमोदकः ।
सुबोधिनीदुरूहोक्तिव्याख्यानप्रीतमानसः ॥ ७६॥
निगूढस्वाशयगतस्वतन्त्रार्थप्रियप्रियः ।
स्वरूपगुणनामोक्तिस्वीयसौभाग्यवर्द्धनः ॥ ७७॥
विद्वन्मण्डनवादोक्तिपरपक्षनिरासकृत् ।
सोपाधिब्रह्मवादार्थनिराकरणपण्डितः ॥ ७८॥
अप्राकृतानन्तगुणाधारब्रह्मस्वरूपवित् ।
सामान्यप्राकृतगुणानाश्रयत्वप्रकाशकः ॥ ७९॥
विरुद्धधर्माधारत्वस्थापनैकप्रयत्नकृत् ।
असम्भवनिरासार्थानन्तानिर्वाच्यशक्तिवित् ॥ ८०॥
प्राकृतेन्द्रियसामर्थ्याव्यवहार्यत्वदर्शकः ।
भगवद्दत्तसामर्थ्यसुखवेद्यत्ववित्तमः ॥ ८१॥
तर्कशास्त्रोक्तसिद्धान्तनिरासवरयुक्तिमान् ।
सोपाधिजीववादैकनिराकर्ता महाशयः ॥ ८२॥
आत्मव्यापकतातर्कपराहतविचक्षणः ।
श्रुतिसूत्रादिसंसिद्धजीवाणुत्वप्रदर्शकः ॥ ८३॥
चिद्रूपब्रह्मधर्मात्मजीवनित्यनिदर्शकः ।
भेदवादनिराकर्ता ब्रह्मांशत्वनिरूपकः ॥ ८४॥
नित्यानन्दब्रह्मधर्मधर्म्यभेदप्रकाशकः ।
सद्रूपब्रह्मधर्मात्मजगन्नित्यत्वदर्शकः ॥ ८५॥
मिथ्यात्वजन्यतावादा वैदिकत्वप्रकाशकः ।
अविद्याकार्यसंसारमिथ्यात्वपरिदर्शकः ॥ ८६॥
प्रपञ्चसंसारभिदाप्रदर्शनसुयुक्तिमान् ।
आविर्भावतिरोभावसिद्धान्तपरिशोधकः ॥ ८७॥
मूलेच्छाशक्तिसर्वार्थसामञ्जस्य प्रदर्शकः ।
कार्यप्रपञ्चभगवद्विभूत्यात्मत्वदर्शकः ॥ ८८॥
लीलाप्रपञ्चभगवत्स्वरूपात्मत्ववित्तमः ।
द्वारिकामथुरागोष्ठलीलानित्यत्वदर्शकः ॥ ८९॥
वृन्दावनगोवर्द्धनकालिन्दीकेलिकौतुकः ।
अन्यथाभानसञ्जातसन्देहविनिवारकः ॥ ९०॥
श्रुतिदृष्टान्तरचनाविस्पष्टार्थनिरूपकः ।
श्रुतिस्मृतिवरप्राप्तिप्रकारपरिदर्शकः ॥ ९१॥
शृङ्गाररसरूपत्वस्थापनातिविशारदः ।
अनेकनित्यनामात्मक्रियावद्ब्रह्मदर्शकः ॥ ९२॥
अत्यनुग्रहवद्भक्तनित्यलीलाप्रवेशवित् ।
आसुरव्यामोहलीलावश्यकत्वनिदानवित् ॥ ९३॥
मायैकमूलभगवद्विमोहकचरित्रवित् ।
निर्दोषानन्दरूपैककृष्णतत्त्वप्रकाशकः ॥ ९४॥
स्फुरद्विहृतिनित्यत्वभावनानन्ददायकः ।
भक्त्युपास्तिविवेकार्थभक्तिहंसप्रकाशकः ॥ ९५॥
मन्त्राद्यगम्यभक्त्येकगम्यश्रीकृष्णरूपवित् ।
अनुग्रहविमर्शार्थभक्तिहेतुप्रकाशकः ॥ ९६॥
कृष्णानुग्रहलभ्यैकभक्तितत्त्वप्रकाशकः ।
मर्यादानुगृहीतात्मभक्त्यर्थाचारदर्शकः ॥ ९७॥
पुष्ट्यनुग्रहवद्भक्तधर्मान्तरनिषेधवित् ।
भक्तिमार्गीयभगवत्प्रतिष्ठारीतिबोधकः ॥ ९८॥
कृष्णजन्माष्टमीरामनवमीव्रतशोधकः ।
मुक्तावलीप्रकाशोक्तिसिद्धान्तपरिशोधकः ॥ ९९॥
नवरत्नप्रकाशोक्तिचिन्तासन्ताननाशकः ।
न्यासादेशीयविवृतिधर्मत्यागोक्तिचिन्तकः ॥ १००॥
जीवन्मुक्तितारतम्यसिद्धान्तपरिशोधकः ।
गीतातात्पर्यसद्वक्ता गायत्र्यर्थप्रकाशकः ॥ १०१॥
मुख्यश्रीस्वामिनीकेलीशृङ्गारोल्लासदर्शकः ।
स्वामिनीप्रार्थनास्तोत्रनानाभावविभावकः ॥ १०२॥
स्वामिन्यष्टकगूढोक्तिमार्गतत्त्वप्रकाशकः ।
प्रेमामृतरसास्वादाऽनुपानपरिदर्शकः ॥ १०३॥
उक्तान्यपूर्वशृङ्गारदानलीलाप्रकाशकः ।
कुमारिकाऽनन्यसिद्धव्रतचर्यानिरूपकः ॥ १०४॥
तदेकरससर्वस्वनिभृतात्मा रसार्णवः ।
यमुनास्तोत्रविवृतिर्यशःशक्तिप्रकाशकः ॥ १०५॥
सकृष्णयमुनाभाववर्द्धिन्यष्टपदीप्रियः ।
चौरचर्यागुप्तरसाऽनन्दभावनिरूपकः ॥ १०६॥
रूपामृतैकचषकत्रिभङ्गललिताप्रियः ।
दशावताराष्टपदीशृङ्गारार्थत्वदर्शकः ॥ १०७॥
शृङ्गाररससन्दर्भाऽसङ्गतत्त्वनिरासकः ।
प्रबोधगद्यरचनाप्रत्यहश्रवणोत्सुकः ॥ १०८॥
मङ्गलाखिललीलाब्धिकृष्णगानरसप्रदः ।
प्रेङ्खपर्यङ्कशयनगीतनृत्यप्रियङ्करः ॥ १०९॥
सदारप्रेष्ठरतिकृत्प्रार्थनागीतभाववित् ।
असकृद्गोविन्ददासप्रभृत्यार्यसमन्वितः ॥ ११०॥
गोपीपरिवृढस्तोत्रव्रजाशीधरतिप्रदः ।
व्रजराजार्यतनयप्रीतिकृत्स्तोत्रकीर्तनः ॥ १११॥
गोकुलोत्कर्षबोधार्थगोकुलाष्टकदर्शकः ।
श्रीगोकुलसुखावासस्वकीयानन्दवर्द्धनः ॥ ११२॥
श्रीमन्नन्दालयक्रीडत्कृष्णलीलाप्रकाशकः ।
पुत्रपौत्रादिसौभाग्यसेवर्द्धिपरिदर्शकः ॥ ११३॥
श्रीकृष्णसेवाचातुर्यसीमासर्वशिरोमणिः ।
संसारसागरोत्तारनौकासत्कर्णधारकः ॥ ११४॥
शरणस्थानन्तजीवाऽपराधदलनक्षमः ।
कृष्णसेवाशिक्षणार्थं भक्तिमार्गप्रदर्शकः ॥ ११५॥
मर्यादामार्गविधिना गृहस्थाश्रममास्थितः ।
दारागारसुताप्तादिसर्वस्वात्मनिवेदकः ॥ ११६॥
वैदिकाचारनिपुणो दीक्षिताख्याप्रसिद्धिमान् ।
षड्गुणैश्वर्यसम्पत्तिराजमानः सतां पतिः ॥ ११७॥
विठ्ठलेशप्रभावज्ञः कृतकृत्यतमो हरिः ।
निवृत्तिधर्माभिरतो निजशिक्षापरायणः ॥ ११८॥
भगवद्भक्त्यनुगुणसन्न्यासाचारदर्शकः ।
अलौकिकमहातेजःपुञ्जरूपप्रकाशकः ॥ ११९॥
नित्यलीलाविहरणो नित्यरूपप्रकाशवान् ।
अदभ्रसौहार्दनिधिः सर्वोद्धारविचारकः ॥ १२०॥
शुकवाक्सिन्धुलहरीसारोद्धारविशारदः ।
श्रीभागवतपीयूषसमुद्रमथनक्षमः ॥ १२१॥
श्रीभागवतप्रत्यर्थमणिप्रवरभूषितः ।
अशेषभक्तसम्प्रार्थ्यचरणाब्जरजोधनः ।
शरणस्थसमुद्धारः कृपालुस्तत्कथाप्रदः ॥ १२२॥
इति मथुरानिवासिगोस्वामि श्रीरमणलालजीमहाराजविरचितं
श्रीवल्लभनामस्तोत्रं सम्पूर्णम् ।
Proofread by PSA Easwaran psaeaswaran at gmail.com