Shri Vyasa Stuti 2 or Shri Vasishtha Krishna Ashtakam

 श्रीव्यासस्तुतिः २ अथवा श्रीवासिष्ठकृष्णाष्टकम् 
श्रीशं विचित्रकवितारसपूरिताशं
     श्रीशङ्करोरग खगेन्द्र हृदब्जवासम् ।
आशङ्कमान जनतृप्तिकरोऽतिहासं
     व्यासं नतोऽस्मि हरितोपलसन्निकाशम् ॥ १॥

वेदान्तसूत्र पवनोद्धृत पञ्चवेदा
     मोदांशतोषित सुरर्षिनरादिभेदाम् ।
बोधाम्बुजात लसितां सरसीमगाधां
     श्रीदां शितोऽस्मि शुकतातपदामखेदाम् ॥ २॥

द्वैपायनो जयति यन्निजशक्तिदीपः
     पापाभिवर्धित कुवादितमिस्रतापः ।
पापाख्यदुर्भगदशाकृति तीव्रकोपः
     पापाद्भुतौषधिरगे श्वसनांशरूपः ॥ ३॥

इन्द्रादिदैवत हृदाख्य चकोरचन्द्रा
     मन्दाशु कल्पशुभ जल्पित पुष्पवृन्दः ।
वृन्दारकाङ्घ्र्युपलता गुणरत्नसान्द्रो
     मन्दाय मे फलतु कृष्णतरुः फलं द्राक् ॥ ४॥

माताहितेव परिरक्षतियेन गीता
     गीताग्र्य भारत पुराणकृताविगीता ।
वातांश मध्ववरदः सगिरो ममैताः
     ख्याता पराशरसुतो विदधातु धाता ॥ ५॥

पारं भवाख्यजलधेर्भुवनैकसारं
     स्वैरं कृतोरुविध वेद पथ प्रचारम् ।
आरञ्जितामरजनं सुखचिच्चरीरं
     धीर स्मरामि हृदि सत्यवतीकुमारम् ॥ ६॥

भावाश्रितं यमनुसृत्य भजन्ति देवाः
     सेवारताश्व मुनयः कवयोनृदेवाः ।
यो वासुदेव वपुरस्य महानुभावां
     च्छ्रिबादरायण हरेर्न गृणीत कोवा ॥ ७॥

ज्ञानं प्रदेहि भवदागमवार्ध्यधीनं
     श्रीनन्दसूनु पदभक्ति नदीनिदानम् ।
आनन्दतीर्थवरदोच्च महाध्वनीनं
     दीनं बदर्यधिपते कुरु माममानम् ॥ ८॥

वासिष्ठवंशतिलकस्य हरेर्मनोज्ञं
     दोषौघखण्डनविशारदमष्टकं ये ।
दासाः पठन्त्यनुदिनं भुवि वादिराज
     धीसम्भवं परिभवो न दिशाशु तेषाम् ॥ ९॥

इति श्रीवादिराजयतिविरचिता व्यासस्तुतिः समाप्ता ।


Encoded and proofread by Krishnananda Achar