बद्रिकेशाष्टकं

बद्रिकेशाष्टकं

हे बद्रिकेश करुणामय दीनबन्धो हे बोधरूप सुखचिन्मय तत्त्वमूर्ते । हे नारदादिमुनिसेवितपादपद्म संसारदुःखगहनात् परिपाहि विष्णो ॥ १॥ हे कम्बुकण्ठ खगवाहन चक्रहस्त हे कर्महीन गतिबोधक वेदसार । हे नारसिंह नरसेवित योगमूर्ते संसारदुःखगहनात् परिपाहि विष्णो ॥ २॥ हे वेदगीत गिरिमध्यकृतप्रतिष्ठ हे तापसालिमुनिभृङ्गनुताङ्घ्रिपद्म । हे भक्तिमुक्तिशमकाननदेवदारो संसारदुःखगहनात् परिपाहि विष्णो ॥ ३॥ हे भक्तलोकरतिदायक मोहनाङ्ग हे सामवेदपरिभावितगानमूर्ते । हे सिद्धलोकपरिसेवितकेवलात्मन् संसारदुःखगहनात् परिपाहि विष्णो ॥ ४॥ हे वामदेवविधिपूजितवन्द्यरूप हे श्रीनिवास दरचक्रगदादिहस्त । हे निर्मलाद्रिशुभसानुषु वर्तमान संसारदुःखगहनात् परिपाहि विष्णो ॥ ५॥ हे नित्ययोगनिरताद्भुतयोगिराजन् हे कल्पहीन कलितात्मसमाधिनिष्ठ । हे सर्वभूतहृदिकञ्जकृतप्रतिष्ठ संसारदुःखगहनात् परिपाहि विष्णो ॥ ६॥ हे विश्वनाथ भुवनत्रयगर्भरूप हे ध्यानगम्य गमनागमहीनतत्त्व । हे नित्यबोधनियतात्महृदाभिवन्द्य संसारदुःखगहनात् परिपाहि विष्णो ॥ ७॥ हे देवदेव शरणागतवत्सलात्मन् हे मुक्तलोकविनुताद्भुतसत्यरूप । हे योगनाथ तनुमध्यगतात्मदीप संसारदुःखगहनात् परिपाहि विष्णो ॥ ८॥ इति श्रीरमणचरणतीर्थस्वामिविरचितं बद्रिकेशाष्टकं सम्पूर्णम् ।
% Text title            : Badrikesha Ashtakam
% File name             : badrikeshAShTakam.itx
% itxtitle              : badrikeshAShTakam (ramaNacharaNatIrthasvAmivirachitaM)
% engtitle              : badrikeshAShTakam
% Category              : devii
% Location              : doc_devii
% Sublocation           : devii
% Author                : Ramanacharana Tirtha SwAmi
% Language              : Sanskrit
% Subject               : philosophy/hinduism/religion
% Transliterated by     : Sowmya Sreeram
% Proofread by          : Sowmya Sreeram, NA
% Indexextra            : (Videos 1, 2)
% Latest update         : November 17, 2024
% Send corrections to   : sanskrit at cheerful dot c om
% Site access           : https://sanskritdocuments.org

This text is prepared by volunteers and is to be used for personal study and research. The file is not to be copied or reposted for promotion of any website or individuals or for commercial purpose without permission. Please help to maintain respect for volunteer spirit.

BACK TO TOP
sanskritdocuments.org