Bhargashikha Stotram

 भर्गशिखास्तोत्रम् 
अपर्णा सुफला यज्ञा सभया निभया वहा ।
भीमस्वना भर्गशिखा भास्वती भास्करा विभा ॥ १॥

        भीमेश्वरी च भेरुण्डा भगेशी भगसर्पिणी ।
        भगलिङ्गस्थिता भाग्या भाग्यदा भगमालिनी ॥ २॥

भर्गशिखे जगन्माता भर्गशिखे जगत्पिता ।
भर्गशिखे जगद्धात्री भर्गशिखे नमो नमः ॥ ३॥

        चतुर्भुजे चतुर्वक्त्रा संस्तुते परमेश्वरी ।
        जयकृष्णे स्तुते देवि सर्वदुर्गतिनाशिनी ॥ ४॥

सर्वबाधामहारोगाभूतबाधास्तथैव च ।
जपमानेन नश्यन्ति जीवेच्च शरदा शतम् ॥ ५॥

        दारिद्र्यव्यसनध्वंसी श्रीमती देवी भर्गशिखा ।
        त्रैलोक्यवासिनामीड्ये लोकानां वरदा भव ॥ ६॥

अनाथस्य च दीनस्य जगत्तारणि भर्गशिखा ।
शरणागत जीवानां सर्वदुःखविनाशिनी ॥ ७॥

        सर्वसिद्धिमवाप्नोति सर्वत्र विजयी भवेत् ।
        भर्गस्तोत्रहृदयं पुण्यं भर्गशिखा विभूषितम् ॥ ८॥

इति भर्गशिखास्तोत्रं सम्पूर्णम् ।


Bhargashikha is the the plume of the Bharga
as one of the names of the Sun god.
More details of the Martanda, Martandesh,
and a temple of Goddess Bhargashikha are
in the linked reference Martand Itihas by
Martand Tirath Trust at Mattan, Kashmir.

Encoded and proofread by Rahul Maity