दक्षिणकालिकास्तवः
(श्यामारहस्ये)
महाकालभैरव उवाच ।
स्तवराजं शृणु राम ! सर्वकालमनोहरम् ।
यस्य स्मरणमात्रेण कालिका सम्प्रसीदति ॥ १॥
यज्ञक्तस्त्वं यदेवासि भृगुवंशसमुद्भव ! ।
गोपनीयं प्रयत्न एन पठनीयं परात्परम् ॥ २॥
कालीस्तोत्रं मम प्रेयः कस्मैचिन्न प्रकाशितम् ।
कथ्यते त्वदनुरोधात् सर्वपापप्रणाशनम् ॥ ३॥
शृणु राम ! शृणु राम ! शृणु राम ! सदैव हि ।
गोपनीयं गोपनीयं गोपनीयं न संशयः ॥ ४॥
अथ स्तोत्रम् ।
गणरात्रे मुक्तकेशो नग्नः शक्तिसुसङ्गतः ।
रक्तचन्दनसिन्दूरैस्तथा पञ्चोपचारकैः ॥ १॥
मत्स्यमांससुराद्यैश्च ताम्बूलैश्च विशेषतः ।
पूजयित्वा महाकालीं महाकालरतातुराम् ॥ २॥
तीर्थपानं विधायादौ ताम्बूलं भक्षयेत्ततः ।
भगलिङ्गामृतं मध्ये निवेदयेत् सुसाधकः ॥ ३॥
जपित्वा च महामन्त्रं कालीरूपं मनोहरम् ।
मनसा चिन्तयेत्कालीं पठन् स्तोत्रन्तु साधकः ॥ ४॥
रक्षोयक्षपिशाचेभ्यो नित्यं रक्षाकरं परम् ।
प्रसन्ना कालिका तस्य पुत्रत्वेनानुकम्पते ॥ ५॥
दक्षिणे कालिके ! मातर्मुण्डमालाविभूषिते ! ।
भक्तत्राणव्यग्रचित्ते ! यमजाड्यं विनाशय ॥ ६॥
ज्वलच्चिताग्निमध्यस्थे ! परिवारसमन्विते ।
त्वत्पदाम्भोजमापन्नं रक्ष मां पुत्रवत् सदा ॥ ७॥
महामेघच्छविन्यासे ! मुक्तकेशि ! चतुर्भुजे ! ।
पाण्डित्यं कविताञ्चैव मह्यं देहि महेश्वरि ! ॥ ८॥
वामोर्द्ध्वे च महाखड्गं विधारयसि शङ्करि ! ।
अधोलसच्छिन्नमुण्डे ! मम विघ्नं विनाशय ॥ ९॥
अभयं दक्षिणे चोर्द्ध्वे तथाधःपाणिना वरम् ।
कण्ठसंसक्त मुण्डालि ! महाकालि ! नमोऽस्तु ते ॥ १०॥
फलं -
सततं त्वत्स्वरूपं ये स्मरन्ति साधकोत्तमाः ।
तेषां समस्तशास्त्रेषु गतिरव्याहता सदा ॥ ११॥
चिन्तयामि च त्वन्नाम रक्ष मां सर्वतः सदा ।
दिगम्बरीं करालास्यां घोरदंष्ट्रां भयानकाम् ॥ १२॥
कर्णमूले शवयुग्मां स्थूलतुङ्गपयोधराम् ।
महारौद्रीं महाघोरां श्मशानालयवासिनीम् ॥ १३॥
शवपाणिसमूहैश्च कृतकाञ्चीं हसन्मुखीम् ।
ओष्ठप्रान्तगलद्रक्तधाराविस्फुरिताननाम् ॥ १४॥
मुण्डालीसंस्रवद्रक्तैः सर्वाङ्गे चारुचर्चिताम् ।
शिवाभिर्घोररावाभिश्चतुर्दिक्षु समन्विताम् ॥ १५॥
पूजाकाले पठेद्यस्तु सद्भावपुलको बुधः ।
स भवेत्कालिकापुत्र इति ख्यातिमुपागतः ॥ १६॥
रजस्वलाभगं पश्यन् जप्त्वा कालीमहामनुम् ।
स्तवेनानेन संस्तुत्य साधकः किं न साधयेत् ॥ १४॥
अष्टोत्तरशतञ्जप्त्वा योनिमामन्त्र्य मन्त्रवित् ॥ १५॥
सङ्गम्य पठनादस्य सर्वविद्यश्वरो भवेत् ।
मातेव दक्षिणा तस्य सर्वत्र हितकारिणी ।
तस्य देहे सदा काली वसेद्राम ! न संशयः ॥ १६॥
पूजाजपविहीनाय स्त्रीसुरानिन्दकाय च ।
षण्मार्गस्य रोधकाय गुर्वभक्ताय सर्वदा ॥ १७॥
शृणु वत्स ! प्रयत्नेन स्तवमेनं न दर्शयेत् ।
प्रमादाद्दर्शनाद्वापि तस्य सिद्धिर्भवेन्न हि ॥ १८॥
इति श्यामारहस्यवर्णितं कालिकापरमरहस्ये कालीहृदये
महाकालभैरवपरशुरामसंवादे श्रीदक्षिणकालिकास्तवः सम्पूर्णः ।
- ॥ श्यामारहस्यम् । चतुर्थः परिच्छेदः ॥
- .. shyAmArahasyam . chaturthaH parichChedaH ..
Encoded and proofread by Ruma Dewan