देवादिभिः कृतं गङ्गादि नदीस्तोत्रम्
इति तस्य वचः श्रुत्वा नारदस्य महात्मनः ।
शक्रेण सहिताः सर्वे ह्यवन्तीं तु समागताः ॥ ६४॥
स्तुवन्तो विविधैः स्तोत्रैर्गङ्गां त्रिपथगां शुभाम् ।
गङ्गे देवि नमस्तुभ्यं सर्वपापप्रणाशिनि ॥ ६५॥
वसूनां जननी देवि वसूनां मोक्षदायिनि ।
त्रैलोक्यपावनी नित्यं हरेण शिरसा धृता ॥ ६६॥
सेविता वालखिल्यैश्च कृष्णस्य परमा कला ।
यमुने त्वां नमस्यामः कालिन्दीं वरवाहिनीम् ॥ ६७॥
सुता त्वं पावनी देवि मार्त्तण्डस्य दिवस्पतेः ।
शिप्रे देवि नमस्तुभ्यं ब्रह्मदेहोद्भवे शुभे ॥ ६८॥
प्राची त्वमेव विख्याता पुण्यदेहा सरस्वती ।
या प्राची कौरवक्षेत्रे पुष्करे या महालये ।
सा त्वं शिप्रा प्रसिद्धा च सर्वपातकनाशिनी ॥ ६९॥
त्वं दया सर्वजन्तूनां त्वं स्वर्गः शरणं नृणाम् ।
त्वं माता सर्वजन्तूनां त्वं प्राची भुवि गीयसे ॥ २.७१.७०॥
बहुजन्मकलङ्काङ्कं दृष्ट्वा या देहिनां भुवि ।
करोषि क्षालनं देवि सा त्वं त्रैलोक्यसंस्थिता ॥ ७१॥
आसां च सङ्गमो यस्तु स प्रयागो बुधैः स्मृतः ।
अत्रागत्य तु युष्माभिः स्थापितः स्नापितोऽधुना ॥ ७२॥
सोऽद्य प्रभृति देवोऽयं प्रयागेश्वरसंज्ञकः ।
त्रिषु लोकेषु विख्यातः स्मरणात्पापनाशनः ॥ ७३॥
अत्रागत्य प्रपश्यन्ति ये प्रयागेश्वरं ततः ।
ते कृतार्था भविष्यन्ति सर्वपातकवर्जिताः ॥ ७४॥
कुलं च तारितं तेषां पैतृकं मातृकं तथा ।
गङ्गायास्त्रियुगं पुण्यं चतुर्वर्गफलप्रदम् ।
जायते नात्र सन्देहः प्रयागेश्वरदर्शनात् ॥ ७५॥
गङ्गायां च प्रयागे च देवदारुवने शुभे ।
नैमिषे पुष्करे चैव श्रीशैले च त्रिपुष्करे ॥ ७६॥
त्र्यम्बके धौतपापे च महेन्द्रे भैरवे तथा ।
गोकर्णे च सुवर्णाख्ये रेवाकपिलसङ्गमे ॥ ७७॥
एतेषां दर्शनेनैव या सिद्धिर्द्वादशाब्दिका ।
सा लभ्या मासमात्रेण प्रयागेश्वरदर्शनात् ॥ ७८॥
ये पश्यन्ति चतुर्द्दश्यामष्टम्यां च विशेषतः ।
भक्त्या च नियमं कृत्वा प्रयागेश्वरसंज्ञकम् ॥ ७९॥
न तेषां पुनरावृत्तिः कल्पकोटिशतैरपि ।
भोगदं मोक्षदं लिङ्गं भविष्यति महीतले ॥ २.७१.८०॥
कलास्तिस्रो भविष्यन्ति लिङ्गेऽस्मिन्मोक्षदे शुभे ।
गङ्गा च यमुना प्राची सर्वपातकनाशिनी ॥ ८१॥
एवमुक्त्वा स्तुता गङ्गा यमुना च सरस्वती ।
देवैः प्रणतिपूर्वेण गताः स्थानं स्वकं तदा ॥ ८२॥
देवाः प्रहृष्टाः शक्राद्याः प्रयागेश्वरसंज्ञकम् ।
स्तुत्वा च विविधैः स्तोत्रैः पूजयित्वा दिवं गताः ॥ ८३॥
इति श्रीस्कन्दपुराणे आवन्त्यखण्डे चतुरशीतिलिङ्गमाहात्म्ये
एकसप्ततितमाध्यायान्तर्गतं देवादिभिः कृतं गङ्गादि नदीस्तोत्रं
समाप्तम् ।
स्कन्दपुराण । आवन्त्यखण्ड । चतुरशीतिखण्ड । अध्याय ७१/६५-८१॥
skandapurANa . AvantyakhaNDa . chaturashItikhaNDa . adhyAya 71/65-81..
Proofread by PSA Easwaran