Devaih Kritam 01 Durga Stotram

 देवैः कृतं १ दुर्गास्तोत्रम् १० 

अमरपतिमुकुटचुम्बितचरणाम्बुजसकलभुवनसुखजननी ।
जयति जगदीशवन्दिता सकलामलनिष्कला दुर्गा ॥ ११॥

विकृतनखदशनभूषणरुधिरवशाच्छुरितक्षतखड्गहस्ता ।
जयति नरमुण्डमुडितपिशितसुराहारकृच्चण्डी ॥ १२॥

प्रच्छादितशिखिगणोद्बलविकटजटाबद्धचन्द्रमणिशोभा ।
जयति दिगम्बरभूषा सिद्धवटेशा महालक्ष्मीः ॥ १३॥

करकमलजनितशोभा पद्मासनबद्धपद्मवदना च ।
जयति कमण्डलुहस्ता नन्दादेवी नतार्तिहरा ॥ १४॥

दिग्वसना विकृतमुखा फेत्कारोद्दामपूरितदिशौघा ।
जयति विकरालदेहा क्षेमङ्करी रौद्रभावस्था ॥ १५॥

क्रोशितब्रह्माण्डोदरसुरवरमुखरहुङ्कृतनिनादा ।
जयति मदातिमिहस्ता शिवदूती प्रथमशिवशक्तिः ॥ १६॥

मुक्ताट्टहासभैरवदुःसहतरचकितसकलदिक्चक्रा ।
जयति भुजगेन्द्रमणिशोभितकर्णा महातुण्डा ॥ १७॥

पटुपटहमुरजमर्दलझल्लरिझङ्कारनर्तितावयवा ।
जयति मधुव्रतरूपा दैत्यहरी भ्रामरीदेवी ॥ १८॥

शान्ता प्रशान्तवदना सिंहवरा ध्यानयोगतन्निष्ठा ।
जयति चतुर्भुजदेहा चन्द्रकला चन्द्रमण्डला देवी ॥ १९॥

पक्षपुटचञ्चुघातैः सञ्चूर्णितविविधशत्रुसङ्घाता ।
जयति शितशूलहस्ता बहुरूपा रेवती भद्रा ॥ २०॥

पर्यटति जगति हृष्टा पितृवननिलयेषु योगिनीसहिता ।
जयति हरसिद्धिनाम्नी हरसिद्धिर्वन्दिता सिद्धैः ॥ २१॥

इति भविष्यपुराणे उत्तरपर्वणि एकषष्टितमाध्यायान्तर्गतं
         देवैः कृतं दुर्गास्तोत्रं समाप्तम् ।

भविष्यपुराण । उत्तरभाग । अध्याय ६१/११-२१॥


bhaviShyapurANa . uttarabhAga . adhyAya 61/11-21..

Proofread by PSA Easwaran