Devaih Kritam 02 Devi Stotram

 देवैः कृतं २ देवीस्तोत्रम् 

देवा ऊचुः ।
शिवे शर्वाणि कल्याणि जगदम्ब महेश्वरि ।
त्वां नतास्सर्वथा देवा वयं सर्वार्तिनाशिनीम् ॥ ९॥

न हि जानन्ति देवेशि वेदाश्शास्त्राणि कृत्स्नशः ।
अतीतो महिमा ध्यानं तव वाङ्मनसोश्शिवे ॥ ३.४.१०॥

अतद्व्यावृत्तितस्तां वै चकितं चकितं सदा ।
अभिधत्ते श्रुतिरपि परेषां का कथा मता ॥ ११॥

जानन्ति बहवो भक्तास्त्वत्कृपां प्राप्य भक्तितः ।
शरणागतभक्तानां न कुत्रापि भयादिकम् ॥ १२॥

विज्ञप्तिं श‍ृणु सुप्रीता यस्या दासास्सदाम्बिके ।
तव देवि महादेवि हीनतो वर्णयामहे ॥ १३॥

पुरा दक्षसुता भूत्वा सञ्जाता हरवल्लभा ।
ब्रह्मणश्च परेषां वा नाशयत्वमकं महत् ॥ १४॥

पितृतोऽनादरं प्राप्यात्यजः पणवशात्तनुम् ।
स्वलोकमगमस्त्वं चालभद्दुःखं हरोऽपि हि ॥ १५॥

न हि जातम्प्रपूर्णं तद्देवकार्यं महेश्वरि ।
व्याकुला मुनयो देवाश्शरणं त्वां गता वयम् ॥ १६॥

पूर्णं कुरु महेशानि निर्जराणां मनोरथम् ।
सनत्कुमारवचनं सफलं स्याद्यथा शिवे ॥ १७॥

अवतीर्य क्षितौ देवि रुद्रपत्नी पुनर्भव ।
लीलां कुरु यथायोग्यं प्राप्नुयुर्निर्जरास्सुखम् ॥ १८॥

सुखी स्याद्देवि रुद्रोऽपि कैलासाचलसंस्थितः ।
सर्वे भवन्तु सुखिनो दुःखं नश्यतु कृत्स्नशः ॥ १९॥

इति शिवपुराणे रुद्रसंहितायां पार्वतीखण्डे चतुर्थाध्यायान्तर्गतं
         देवैः कृतं देवीस्तोत्रं समाप्तम् ।

शिवपुराण । रुद्रसंहिता । पार्वतीखण्ड । अध्याय ४/९-१९॥


shivapurANa . rudrasaMhitA . pArvatIkhaNDa . adhyAya 4/9-19..

Proofread by PSA Easwaran