Devaih Kritam 05 Durga Stotram

देवैः कृतं ५ दुर्गास्तोत्रम् १५

देवा ऊचुः । अस्मदर्थं त्वया रूपमनन्ताक्षिमयं धृतम् । मुनयः कीर्तयिष्यन्ति शताक्षीं त्वामतोऽम्बिके ॥ ३४॥ आत्मदेहसमुद्भूतैः शाकैर्लोका मृता यतः । शाकम्भरीति विख्यातं तत्ते नाम भविष्यति ॥ ३५॥ दुर्गमाख्यो महादैत्यो हतो यस्मात्ततः शिवे । दुर्गां भगवतीं भद्रां व्याहरिष्यन्ति मानवाः ॥ ३६॥ योगनिद्रे नमस्तुभ्यं नमस्तेऽस्तु महाबले । नमो ज्ञानप्रदे तुभ्यं विश्वमात्रे नमो नमः ॥ ३७॥ तत्त्वमस्यादिवाक्यैर्या बोध्यते परमेश्वरी । अनन्तकोटिब्रह्माण्डनायिकायै नमो नमः ॥ ३८॥ वाङ्मनःकायदुष्प्रापां सूर्यचन्द्राग्निलोचनाम् । स्तोतुं न शक्नुमो मातस्त्वत्प्रभावाबुधा वयम् ॥ ३९॥ मादृशानमरान्दृष्ट्वा कः कुर्यादीदृशीं दयाम् । वर्जयित्वा सुरेशानीं शताक्षी मातरं विना ॥ ४०॥ त्रिलोकी नाभिभूयेत बाधाभिश्च निरन्तरम् । एवं कार्यस्त्वया यत्नोऽस्माकं वैरिविनाशनम् ॥ ४१॥ इति शिवपुराणे उमासंहितायां पञ्चाशत्तमाध्यायान्तर्गतं देवैः कृतं दुर्गास्तोत्रं समाप्तम् । शिवपुराण । उमासंहिता । अध्याय ५०/३४-४१॥ shivapurANa . umAsaMhitA . adhyAya 50/34-41.. Proofread by PSA Easwaran