Devaih Kritam 07 Durga Stotram

देवैः कृतं ७ दुर्गास्तोत्रम् १७

देवा ऊचुः । जय दुर्गे महेशानि जयात्मीयजनप्रिये । त्रैलोक्यत्राणकारिण्यै शिवायै ते नमो नमः ॥ ३॥ नमो मुक्तिप्रदायिन्यै पराम्बायै नमो नमः । नमः समस्तसंसारोत्पत्तिस्थित्यन्तकारिके ॥ ४॥ कालिकारूपसम्पन्ने नमस्काराकृते नमः । छिन्नमस्तास्वरूपायै श्रीविद्यायै नमोऽस्तु ते ॥ ५॥ भुवनेशि नमस्तुभ्यं नमस्ते भैरवाकृते । नमोऽस्तु बगलामुख्यै धूमावत्यै नमो नमः ॥ ६॥ नमस्त्रिपुरसुन्दर्य्यै मातङ्ग्यै ते नमोनमः । अजितायै नमस्तुभ्यं विजयायै नमो नमः ॥ ७॥ जयायै मङ्गलायै ते विलासिन्यै नमो नमः । दोग्ध्रीरूपे नमस्तुभ्यं नमो घोराकृतेऽस्तु ते ॥ ८॥ मनोऽपराजिताकारे नित्याकारे नमो नमः । शरणागतपालिन्यै रुद्राण्यै ते नमो नमः ॥ ९॥ नमो वेदान्तवेद्यायै नमस्ते परमात्मने । अनन्तकोटिब्रह्माण्डनायिकायै नमो नमः ॥ १०॥ इति शिवपुराणे उमासंहितायां सप्तचत्वारिंशाध्यायान्तर्गतं देवैः कृतं दुर्गास्तोत्रं साप्तम् । शिवपुराण । उमासंहिता । अध्याय ४७/३-१०॥ shivapurANa . umAsaMhitA . adhyAya 47/3-10.. Proofread by PSA Easwaran