Devaih Kritam 1 Shri Lakshmi Stotram

देवैः कृतं १ श्रीलक्ष्मीस्तोत्रम्

देवा ऊचुः । नमः श्रियै लोकधात्र्यै ब्रह्ममात्रे नमो नमः । नमस्ते पद्मनेत्रायै पद्ममुख्यै नमो नमः ॥ ९९॥ प्रसन्नमुखपद्मायै पद्मकान्त्यै नमो नमः । नमो बिल्ववनस्थायै विष्णुपत्न्यै नमो नमः ॥ १.९.१००॥ विचित्रक्षौमधारिण्यै पृथुश्रोण्यै नमो नमः । पक्वबिल्वफलापीनतुङ्गस्तन्यै नमो नमः ॥ १०१॥ सुरक्तपद्मपत्राभकरपादतले शुभे । सुरत्नाङ्गदकेयूरकाञ्चीनूपुरशोभिते । यक्षकर्दमसंलिप्तसर्वाङ्गे कटकोज्ज्वले ॥ १०२॥ माङ्गल्याभरणैश्चित्रैर्मुक्ताहारैर्विभूषिते । ताटङ्कैरवतंसैश्च शोभमानमुखाम्बुजे ॥ १०३॥ पद्महस्ते नमस्तुभ्यं प्रसीद हरिवल्लभे । ऋग्यजुःसामरूपायै विद्यायै ते नमो नमः ॥ १०४॥ प्रसीदास्मान्कृपादृष्टिपातैरालोकयाब्धिजे । ये दृष्टास्ते त्वया ब्रह्मरुद्रेन्द्रत्वं समाप्नुयुः ॥ १०५॥ इति श्रीस्कन्दपुराणे वैष्णवखण्डे वेङ्कटाचलमाहात्म्ये नवमाध्यायान्तर्गतं देवैः कृतं श्रीलक्ष्मीस्तोत्रं समाप्तम् । स्कन्दपुराण । वैष्णवखण्ड । वेङ्कटाचलखण्ड । अध्याय ९/९९-१०५॥ skandapurANa . vaiShNavakhaNDa . venkaTAchalakhaNDa . adhyAya 9/99-105.. Proofread by PSA Easwaran