Devakali Ashtakam Devakali Mahima Stotram

 देवकाल्यष्टकम् अथवा देवकालीमहिमा स्तोत्रम् 
ते देवकालि ! कलिकर्म विनाशयन्ति
      वन्दारु-संहतिषु शर्म विकाशयन्ति ।
ज्ञानामृतानि हृदये परिवाहयन्ति
      ये तावकीन-पदपङ्कजमर्चयन्ति ॥ १॥

ते देवकालि ! कुल-कीर्तिमुदञ्चयन्ति
      दिक्षु प्रताप-पटलीमवतंसयन्ति ।
विद्या-परिष्कृति-चणानपि मूकयन्ति
      येऽन्तः सदैव भवतीमधिवासयन्ति ॥ २॥

ते देवकालि ! भुवनानि वशं नयन्ति
      शिष्टिं नृपेन्द्र-मुकुटेषु निवेशयन्ति ।
दुःखान्धकार-पटलानि विपाटयन्ति
      ये त्वामुदार-करुणामसृणां श्रयन्ति ॥ ३॥

ते देवकालि ! कवितामृतमूर्जयन्ति
      संसत्सु वाद-निपुणानपि तर्जयन्ति  ।
कामादि-कर्कश-रिपु-प्रकराञ्जयन्ति
      ये तावक स्मरण-सौभगमार्जयन्ति ॥ ४॥

ते देवकालि ! कलिसम्पदमर्दयन्ति
      दुर्वासनान्ध-तमसानि विमर्दयन्ति ।
सौभाग्य-सारिणि ! जगन्ति पवित्रयन्ति
      ये श्रीमतीं हृदय-वेश्मनि चित्रयन्ति  ॥ ५॥

ते देवकालि ! सुख-सूक्तिमदभ्रयन्ति
      विद्या-कलाप-कृषि-मण्डलमभ्रयन्ति ।
देशान्तरेषु चरितानि विशेषयन्ति
      ये शर्म-धाम तव नाम निरूपयन्ति  ॥ ६॥

ते  देवकालि ! कुकृतानि निकृन्तयन्ति
      संसार-दुःख-निगडानि विभञ्जयन्ति  ।
शान्तिं परामधिमनः परिचारयन्ति
      ये तवत्कथामृत-रसान् सततं धयन्ति ॥ ७॥

ते नूत्नेन्दीवराभे ! भवभय-जलधिं शीघ्रमुल्लङ्घयन्ति
      प्रध्मातस्वर्णवर्णे ! निखिल-सुख-कलोल्लासमासादयन्ति ।
फुल्लन्-मल्ली-मतल्ली-प्रतिभट-सुषमे ! हर्षमुत्कर्षयन्ति
      श्रीमातः ! सततं ये तव भजनविधौ चित्तमायोजयन्ति ॥ ८॥

अयोध्या-प्रान्त-वासिन्याः सुदर्शन-कृतस्थितेः ।
देवकाल्याः स्तोत्रमेतत् पठतां घटतां शिवम् ॥ ९॥

इति श्रीदुर्गाप्रसादद्विवेदीविरचितं देवकाल्यष्टकम् अथवा देवकालीमहिमा स्तोत्रं सम्पूर्णम् ।



Encoded and proofread by Rajani Arjun Shankar