गङ्गास्तवः
प्रयाताऽगात्तुङ्गाद्विधिभवनरङ्गालयतले
निवासाकाशाच्चेदतितपस आशुप्रपतिता ।
अनङ्गारेरङ्गात्कनखलसुसङ्गात्प्रचलिता
प्रयागात्सा गङ्गा प्रकटिततरङ्गाऽर्णवगता ॥ १॥
औदार्यन्तेऽनिवार्यं कथय कथमहो कार्यधार्यप्रपन्न
मासन्नं ते विलसतिजने भुक्तिमुक्तिर्वदामि ।
स्वामित्वं त्वं दिशसि नितरां पामराणां नराणां
मान्यं नान्यं भुवनभवने यत्परं प्रार्थयामि ॥ २॥
गाङ्गे जले यः प्रविगाहते तेऽमृते च शेतेऽहिपतेः शरीरे ।
तीरे गता ये दुरितावृताङ्गाः साङ्गाः परीवारयुता विशुद्धाः ॥ ३॥
पापी तापी सशापी सुरसरिदवनो मध्यगो यः सुरापी
कापीयञ्चाभितापी सदयहृदयतश्चेत्प्रतापी च जापी ।
दाता माता जनकगुरुगोभक्तियुक्तः प्रयाति
शम्भुत्वं ते जललवयुतश्चोद्धृतिर्वै विचित्रा ॥ ४॥
दानैर्ज्ञानैश्च गानैर्व्रतनियमगणैर्योगयागावदानै-
र्यानैर्वायोर्विधानैर्जपभजनदयातीर्थयात्रादिकानाम् ।
सन्मानैर्भूसुराणां दिशति हरिहरावात्मलोकं हि गङ्गे !
पापीनां त्वं विनैभिर्हरिहरमकरोत्को वदाग्रस्तदन्यः ॥ ५॥
गङ्गेऽति चिन्ता हृदये मदीये लोकैस्तिरस्कारवृतं शरीरम् ।
क्लिन्नं गलत्कुष्ठयुतं विभिन्नं छिन्नं कथं विष्णुशिवं करोषि ॥ ६॥
नाश्चर्यमेत्तव लोकमातर्माताऽऽत्मपुत्रं कुरुते पवित्रम् ।
मूत्रैर्मलेधूलिभिरावृतं तं स्वाङ्के करोत्यम्बुनिजाञ्चलैश्च ॥ ७॥
चित्रगुप्त इह यस्य पातके लेखनेन शिथिलीकृताङ्गुलिः ।
तारयेद्यदि महत्त्वमम्ब ! तत्ते द्विजे खलु प्रयागदत्तके ॥ ८॥
इति श्रीमद्रामकुमारात्मजप्रयागदत्तविरचितः गङ्गास्तवः समाप्तः ।
Encoded and proofread by Shree Devi Kumar shreeshrii at gmail.com