श्री गङ्गास्तवनम्
मुरारेः सर्वस्वं प्रचुरतपसां खण्डपरशोः
फलं भूभद्राजा सुसमतनुजायाः प्रियसखी
विरञ्चेर्वेदार्थामृतसरसधारेभवदना-
ऽम्बिकोच्चंवर्चस्यं क्रमत इह जह्नोस्त्रिभुवने ॥ १॥
कमण्डल्वां धात्रा हरिचरणमाक्षाल्य निहिता
बृहज्ज्योतीरूपा कलुषमहिषामर्दनपटुः ।
महादुर्गा दुर्गत्यतुलवलदावानलशिखा
ततः शैवे मूर्ध्नि प्रसरसि ततोऽङ्के हिमवतः ॥ २॥
क्रमादेवं गङ्गे त्रिपथमघमाश्रित्य भवती
जगत्यां लोकानां कलिकलुषमालाप्रशमनी ।
विधत्सेऽनायासं प्रगुणपुरुषार्थंश्च चतुरो
निराशोऽयं माभूत् सकलविधिहीनः शरणदे ॥ ३॥
अघौघार्ताः क्षुद्रास्तव सलिलपानं विदधतो
निरातङ्का रङ्का अपि गलितपङ्का सुकृतिनः ।
द्रुतं भावं भावं प्रकृतिसुखसन्दोहपदवीं
लभन्तेऽध्यासीनाः सततशमसम्पत्तिमतुलाम् ॥ ४॥
पुनाना त्वं लोकान् दलितगुरुतापान् निरयतो
हठात् त्रायं त्रायं त्रिदिववनिता लालिततनून् ।
विधत्से दृष्ट्वैतत्च्छमनशमवार्ता विरहिता-
दसीया वै दूताः कलकलपसंशोकविधुराः ॥ ५॥
अहं श्रावं श्रावं विरुदशरणोऽन्ते व्यवसितो
निजोद्धारे मातर्विबुधतटिनि प्राज्यतमसाम् ।
महागारो मन्दो मदनमधनोल्लासितजटे
कथञ्चिन्नोपेक्ष्यस्तव विमृशकं यामि शरणम् ॥ ६॥
अये मातस्त्रय्यर्पितकुशलभारः सुखमहं
शये नव्यासङ्गस्त्वदितरसमाराधनविधो ।
विधेया नोहेलेषदपि मम निस्तारसमय
ऋते त्वत्को नाम क्षणमपि निरीक्षेत वदनम् ॥ ७॥
नभस्वान्ते लोलोर्मिप्रपदवलीम्प्राप्य पयसां
महैनः सम्क्षोभाद्विकलविधिसम्मर्दविहितः ।
मरावाश्लिष्यन्यद् यदुपरतदेहं चलितवान्
अहो सोऽम्ब प्राप्तः सुरपतिपुरन्तत् प्रमुदितः ॥। ८॥
ललाटेषूत्कीर्णां विधिविहित दुलेखि विततिं
जनानामातार्त्नां तव सविधगानां तिरयसि ।
निशम्यैतन्मां तत्स्वशरणसमायातमधुना
समुद्धर्तुं मातः परिकरविधित्सा भवतु मे ॥ ९॥
इति श्रीविष्णुप्रसादपाण्डेयशास्त्रीविरचितं श्रीगङ्गास्तवनं सम्पूर्णम् ॥
Encoded by Musiri Janakiraman
Proofread by Musiri Janakiraman, PSA Easwaran