श्रीगङ्गास्तुतिः
श्रीहरेश्चरणाम्बुजनिःसृता मङ्गला शिवमस्तकशोभना ।
पावना भवदुःखविनाशिनी भक्तिदा सुखदा परमुक्तिदा ॥ १॥
पापहं भवतापविनाशकं शान्तिदं सुखदं परमुक्तिदम् ।
अम्ब ते सलिलं परमामृतं मज्जनं तव भूमि सुखात्मकम् ॥ २॥
किं वर्णयामि जगदम्ब तवात्र चित्रं
माहात्म्यमेतदतिशुद्धमनन्तवीर्यम् ।
शुद्धात्मभिः सकलविद्भिरपारकीर्तिः
संस्तूयते परमदिव्यपदैः पवित्रैः ॥ ३॥
प्रभातसमयच्छविस्तव शुभे महाह्लादिनी
मनः प्रशमनङ्करा सकलपावनी ज्ञानदा ।
सुरर्षिमुनिसेवितं तव तटं निमज्याप्सु ते
पुनाति हृदयं तथा सकलपापिनां तत्क्षणात् ॥ ४॥
क्वचिच्छ्रुतिमनोहरं स्तवनमम्ब ते श्रूयते
क्वचित्तवतटीश्रुतिश्रवणमङ्गला सस्वरा ।
क्वचित्स्तिमितलोचना बुधजनाः समाधिस्थिताः
क्वचित्तव जलाञ्जलिं परिभृता जना भूसुराः ॥ ५॥
उद्यद्भास्कररश्मयः सुविमलाः सक्तास्त्वदीये जले
विश्वाभासनमम्बकार्यमखिलं कर्तुं भुवः प्रस्थिताः ।
दिव्याकुङ्कमपूजनप्रसरिता रक्ताङ्गवर्णप्रभा
काप्युल्लासकरी सतां विजयते या शर्मदा पावनी ॥ ६॥
सुपुष्टफलभारतः प्रविनताः सुवृक्षा इमे
महोन्नतिशिरस्थितां सुजनसंस्थितिं त्वत्तटे ।
स्थिताः परमशोभितास्सपदि दर्शयन्तो मुदा
त्वदीयतटसंस्थिता सुखघनवनश्री सदा ॥ ७॥
ग्रामा ग्रामजनास्तथैव पशवो ये पक्षिणस्त्वत्तटे
धन्यास्ते परिपोषिताः सुविमलास्त्वत्स्नानपानादिभिः ।
धन्यास्ते मुनयः समाश्रितपदे वैराग्यवृत्तास्सदा
ज्ञानान्मोक्षसुखैः सुतृप्तिनिलयाः सम्पद्युताः पामराः ॥ ८॥
गङ्गे त्वदीयपदपङ्कजमात्मतृप्त्या
ध्यात्वाहमप्यविचलः सुखभूमरूपम् ।
त्वं ब्रह्मरूपसकलात्मसुखं विधात्री
राराजसे सुविमला भुवि ब्रह्मरूपा ॥ ९॥
इति श्रीमत् परमहंसपरिव्राजकाचार्य सद्गुरु भगवान्
श्रीधरस्वामीमहाराजविरचिता श्रीगङ्गास्तुतिः सम्पूर्णा ।
रचनास्थानं - श्री क्षेत्र वरदपुर, संवत्सर - १९७२
Proofread by Manish Gavkar