गोस्तोत्रं
क्षीरोदतोयसम्भूता याः पुरामृतमन्थने ।
पञ्चगादः शुभाः पार्थ पञ्चलोकस्यमातरः ॥ १॥
नन्दा सुभद्रा सुरभिः सुशीला बहुला इति ।
एता लोकोपकाराय देवानां तर्पणाय च ॥ २॥
जमदग्निभरद्वाजवसिष्ठासितगौतमः ।
जगृहुः कामदाः पञ्च गावो दत्ताः सुरैस्ततः ॥ ३॥
गोमयं रोचना मूत्रं क्षीरं दधि घृतं गवाम् ।
षडङ्गानि पवित्राणि संशुद्धिकरणानि च ॥ ४॥
गोमयादुत्थितः श्रीमान् बिल्ववृक्षः शिवप्रियः ।
तत्रास्ते पद्महस्ता श्रीः श्रीवृक्षस्तेन स स्मृतः ॥ ५॥
बीजान्युत्पलपद्मानां पुनर्जातानि गोमयात् ।
गोरोचना च माङ्गल्या पवित्रा सर्वसाधिका ॥ ६॥
गोमूत्राद् गुग्गुलुर्जातः सुगन्धिः प्रियदर्शनः ।
आहारः सर्वदेवानां शिवस्य च विशेषतः ॥ ७॥
यद्बीजं जगतः किञ्चित् तज्ज्ञेयं क्षीरसम्भवम् ।
दधिजातानि सर्वाणि मङ्गलान्यर्थसिद्धये ॥ ८॥
घृतादमृतमुत्पन्नं देवानां तृप्तिकारणम् ।
ब्राह्मणश्चैव गावश्च कुलमेकं द्विधा कृतम् ॥ ९॥
एकत्र मन्त्रास्तिष्ठन्ति हविरन्यत्र तिष्ठति ।
गोषु यज्ञाः प्रवर्तन्ते गोषु देवाः प्रतिष्ठिताः ।
गोषु वेदाः समुत्कीर्णाः सषडङ्गपदक्रमाः ॥ १०॥
इति श्री भविष्यपुराणान्तर्गतं गोस्तोत्रं समाप्तम् ॥
भविष्यपुराण । उत्तरपर्व । अध्याय ६९/१६-२४॥
bhaviShyapurANa . uttaraparva . adhyAya 69/16-24..
Encoded and proofread by Sudeep Dalbanjan