Hanumatkritam Sita Stotram

 हनुमत्कृतं सीतास्तोत्रम् 

इति स्तुत्वा वायुपुत्रो रामचन्द्रं घृणानिधिम् ॥ ४९॥

सीतामप्यभितुष्टाव भक्तियुक्तेन चेतसा ।
जानकि त्वां नमस्यामि सर्वपापप्रणाशिनीम् ॥ १.४६.५०॥

दारिद्र्यरणसंहर्त्रीं भक्तानामिष्टदायिनीम् ।
विदेहराजतनयां राघवानन्दकारिणीम् ॥ ५१॥

भूमेर्दुहितरं विद्यां नमामि प्रकृतिं शिवाम् ।
पौलस्त्यैश्वर्यसंहर्त्रीं भक्ताभीष्टां सरस्वतीम् ॥ ५२॥

पतिव्रताधुरीणां त्वां नमामि जनकात्मजाम् ।
अनुग्रहपरामृद्धिमनघां हरिवल्लभाम् ॥ ५३॥

आत्मविद्यां त्रयीरूपामुमारूपां नमाम्यहम् ।
प्रसादाभिमुखीं लक्ष्मीं क्षीराब्धितनयां शुभाम् ॥ ५४॥

नमामि चन्द्रभगिनीं सीतां सर्वाङ्गसुन्दरीम् ।
नमामि धर्मनिलयां करुणां वेदमातरम् ॥ ५५॥

पद्मालयां पद्महस्तां विष्णुवक्षस्थलालयाम् ।
नमामि चन्द्रनिलयां सीतां चन्द्रनिभाननाम् ॥ ५६॥

आह्लादरूपिणीं सिद्धिं शिवां शिवकरीं सतीम् ।
नमामि विश्वजननीं रामचन्द्रेष्टवल्लभाम् ।
सीतां सर्वानवद्याङ्गीं भजामि सततं हृदा ॥ ५७॥

इति श्रीस्कन्दपुराणे ब्रह्मखण्डे सेतुखण्डे षट्चत्वारिंशा- ध्यायान्तर्गतं
         हनुमत्कृतं सीतास्तोत्रं समाप्तम् ।

स्कन्दपुराण । ब्राह्मखण्ड । सेतुखण्ड । अध्याय ४६/५०-५७॥


skandapurANa . brAhmakhaNDa . setukhaNDa . adhyAya 46/50-57..

Proofread by PSA Easwaran