Shri Kamakhya Kavacham 3

 श्रीकामाख्याकवचम् ३ 

ईश्वर उवाच ।
श‍ृणु देवि प्रवक्ष्यामि कवचं सिद्धिदं शुभम् ।
कामाख्याया महागुह्यं सर्वरक्षाकरं परम् ॥ १॥

यस्य स्मरणमात्रेण विघ्नजालं प्रणश्यति ।
भूतप्रेतपिशाचाद्या दूरतो यान्ति सर्वदा ॥ २॥

ॐ कामाख्या मे शिरः पातु त्रिपुरा ललितानना ।
भ्रुवोर्मध्ये तारा पातु नेत्रे नीलसरस्वती ॥ ३॥

कर्णौ मे भैरवी पातु नासिकां बगलामुखी ।
मुखं मातङ्गिनी पातु जिह्वां वागीश्वरी सदा ॥ ४॥

दन्तान् मे कमला पातु चिबुकं चण्डिका शुभा ।
कण्ठं मे त्रिपुरेशानी स्कन्धौ दुर्गा सदावतु ॥ ५॥

बाहू मे भुवनेशी च करौ कामप्रदायिनी ।
अङ्गुलीः सिद्धिदा पातु नखान् नित्याऽवतु प्रभा ॥ ६॥

वक्षःस्थलं महालक्ष्मीः हृदयं परमेश्वरी ।
नाभिं मे योनिरूपा सा कुक्षिं कामेश्वरी तथा ॥ ७॥

कटिं मे कामरूपस्था गुह्यं गुह्येश्वरी तथा ।
ऊरू मे विश्वमाता च जानुनी जगदम्बिका ॥ ८॥

जङ्घे जयप्रदा पातु गुल्फौ मे सर्वमङ्गला ।
पादौ पद्मालयापातु पादाङ्गुल्यः शिवा सदा ॥ ९॥

पूर्वे मां पातु कामाख्या आग्नेय्यां वह्निवल्लभा ।
दक्षिणे कालिका पातु नैऋत्यां रक्तदन्तिका ॥ १०॥

पश्चिमे पातु मे तारा वायव्ये भुवनेश्वरी ।
उत्तरे शारदा पातु ऐशान्यां परमेश्वरी ॥ ११॥

ऊर्ध्वे मां पातु परमा अधस्ताद् योनिमण्डला ।
अन्तर्बोधस्वरूपा मां बहिर्माया सदावतु ॥ १२॥

जले स्थले च गगने स्वप्ने जागरणे तथा ।
सङ्ग्रामे सङ्कटे घोरे पातु मां कामरूपिणी ॥ १३॥

राजद्वारे श्मशाने च वनदुर्गे गिरौ तथा ।
नदीतीरे महाघोरे पातु मां कामसुन्दरी ॥ १४॥

विद्यायां पातु मे विद्या धने लक्ष्मीः सदावतु ।
भक्तौ मे भाविनी पातु मोक्षे मां परदेवता ॥ १५॥

योनिमुद्रा महाशक्तिः कुण्डली पररूपिणी ।
चिदाकाशे सदा पातु स्वप्रकाशस्वरूपिणी ॥ १६॥

न मन्त्रं न तपो दानं न तीर्थं न च साधनम् ।
समं भवति देवेशि कवचस्यास्य धारणात् ॥ १७॥

भूर्जपत्रे समालिख्य रक्तसूत्रेण वेष्टितम् ।
धारयेद् भक्तिभावेन सर्वसिद्धिं लभेन्नरः ॥ १८॥

पठेद्यः प्रातरुत्थाय शुचिर्भूत्वा समाहितः ।
तस्य हस्ते सदा सिद्धिः वक्त्रे वाणी निवर्तते ॥ १९॥

कामाख्या परमाविद्या कामाख्या परमं तपः ।
कामाख्या परमं ब्रह्म कामाख्या शरणं मम ॥ २०॥

॥ इति श्रीकामाख्याकवचं सम्पूर्णम् ॥



Encoded and proofread by Durga Sharma