Kashyapakritam Gayatrisarasvati Stotram

काश्यपकृतं गायत्रीसरस्वतीस्तोत्रम्

काश्यप उवाच । चतुराननगेहिन्यौ जगद्धात्र्यौ नमाम्यहम् । विद्यास्वरूपे गायत्री-सरस्वत्यौ शुभे उभे ॥ ९९॥ सृष्टिस्थित्यन्तकारिण्यौ जगतो वेदमातरौ । हव्यकव्यस्वरूपे च चन्द्रादित्यविलोचने ॥ १.४१.१००॥ सर्वदेवाधिपे वाणी-गायत्र्यौ सततं भजे । गिरिजा कमला चापि युवामेव जगद्धिते ॥ १॥ युष्मद्दर्शनमात्रेण जगत्सृष्ट्यादिकल्पनम् । युष्मन्निमेषात्सततं जगतां प्रलयो भवेत् ॥ २॥ उन्मेषात्सृष्टिरभवद्भोगायत्रि-सरस्वति । युवयोर्दर्शनादद्य कृतार्थोऽभवमाशु वै ॥ ३॥ मामद्य पातकान्मुक्तं स्नानात्तीर्थ द्वयेऽत्र तु । स्वीकुर्वन्तु मुनिश्रेष्ठा ब्राह्मणा बान्धवास्तथा ॥ ४॥ इतः परं पापकृत्ये मा मे बुद्धिः प्रवर्तताम् । धर्मे प्रवर्ततां नित्यमयमेव वरो मम ॥ ५॥ दीयतां भो महादेव्यौ नान्यमिच्छाम्यहं वरम् ॥ इति श्रीस्कन्दपुराणे ब्रह्मखण्डे सेतुखण्डे एकचत्वारिंशा- ध्यायान्तर्गतं काश्यपकृतं गायत्री-सर्वती-स्तोत्रं समाप्तम् । स्कन्दपुराण । ब्राह्मखण्ड । सेतुखण्ड । अध्याय ४१/९९-१०५॥ skandapurANa . brAhmakhaNDa . setukhaNDa . adhyAya 41/99-105.. Proofread by PSA Easwaran