कावेरीनवरत्नमालिका अथवा सह्यजानवरत्नमालिका
अथ सह्यजानवरत्नमालिका ।
यत्पाथःकणवाहि-मारुतलव-स्पृष्टेषु दुष्टेष्वपि
प्रध्वंसं प्रबलैनसां विदुरिह प्राज्ञा भवाज्ञाजुषः ।
सिष्णासां त्वयि बिभ्रतो मम चिरात् कृष्णाधिके सह्यजे
निष्णाताऽसि न किं विगाहनकृतः पङ्कौघ-सङ्क्षालने ॥ १॥
कावेरि त्वत्कवारि प्रवहति सरितां सार्वभौमीह भूमौ
यत्रायं पुण्यदेशः स तु किमुत वृषाकप्यभीष्ट-स्थलं चेत् ।
काश्या तुल्यानि यानि त्वगणिषत षडप्यार्षगीर्षु स्थलानि
श्वेतारण्यं च तेष्वादिममिह वसतां को यमस्तस्य केऽमी ॥ २॥
कावेरि त्वद्वारि-पूरोदरेऽस्मिन्
स्नायं स्नायं धूतपापोऽस्ततापः ।
आसं जीर्णः पूर्णकामस्तदित्थं
विज्ञाप्यस्ते वल्लभः सिन्धुराजः ॥ ३॥
राज्ञः सेवा दुष्करा सर्वनॄणां
क्रान्तो भीमैर्भीमरूपस्स यस्मात् ।
प्राप्ता ये तद्वल्लभायाः प्रसादं
सिद्धं सर्वाभीष्टमेषां ह्ययत्नात् ॥ ४॥
महारावारवारौघैः भीषणैः श्रोत्रभीतिदैः ।
कथन्नु मादृशां शक्यो राजाऽपामुपसेवितुम् ॥ ५॥
अम्भोनिधेरनुगुणं भवती कलत्रं
लोकान् विलोकनत एव युवां पुनीथः ।
पानावगाहन-मुखोपकृति-प्रकर्षात्
देवि त्वमेनमतिशय्य विभासि मातः ॥ ६॥
कालं प्रतीक्ष्यैव स जातु सेव्यः
त्वत्तोऽधिकं किन्नु फलं ददाति ।
तस्मान्नदीराज-महिष्यलं मे
त्वत्संश्रयो यत्फलमम्ब सूते ॥ ७॥
असह्यपाप-वारिणि त्वदीय-पुण्यवारिणि
क्व सह्यजे निमज्जतामघौघ-साध्वसं नृणाम् ।
विधूतपातका हि ते विनैव कृच्छ्रजश्रमं
प्रयान्ति शम्भुमन्दिरं प्रकृष्ट-पुण्यभासुराः ॥ ८॥
सह्याद्रेः पितुरन्तिकात् पतिगृहं गन्तुं प्रवृत्ता सती
कावेरी कृतचोलमण्डल-परिष्काराऽभ्युदञ्चद्रसा ।
स्वर्णस्तोमयुता सती प्रियतमं सन्तोष्य रत्नाकरं
श्वेतारण्यपतेः प्रसादमयते द्वेधा स्थिता पार्श्वयोः ॥ ९॥
कावेरि त्वत्स्तोत्रमेतत् पठन्ति
श्रद्धाशुद्धा भक्तियुक्ता भवत्याम् ।
स्नातां पुंसां वारिपूरे त्वदीये
यावत्पुण्यं तावदेते लभन्ताम् ॥ १०॥
कदा वा कावेरि त्वयि वृषभतीर्थेऽच्छसलिले
तुलामासे दर्शे सति गगनमध्ये सवितरि ।
समस्ताभिर्गङ्गा-प्रभृति-तटिनीभिस्समुदिते
विगाहिष्ये विप्रैर्निगमनिरतैः पूरिततटे ॥ ११॥
सह्यजा-नवरत्नमालिका
त्यागराजमखिनो मुखोद्गता ।
गृह्यतां परगुणैक-शंसिभिः
शङ्कराङ्घ्रि-कमले समर्पिता ॥ १२॥
Encoded by Suresh Pitre
Proofread by Suresh Pitre, Rajani Arjun Shankar