कावेरीस्तुतिः
%९३
कावेरी निम्नगा वारिलहरीपापहारिणी ।
तारिणी पापिनामेनां भजेऽहं पापहारिणीम् ॥ १॥
स्वसा कृष्णानद्यास्त्रिजगदनवद्यामितगुणा ।
स्वसाराद्यावद्यामखिलमलपद्यामतिघृणा ॥
नृणां गोप्त्र्याच्छाद्य दरमसृतपद्यां हितकरीम् ।
व्यधात्सा कावेरी सरिदवतु नः पुण्यलहरू ॥ २॥
उदीचीस्था गङ्गा पृथुतरतरङ्गातिकपटा ।
भटान्याम्यानुच्चैर्दरकरगिरा या जयति हि ॥
इयं कावेरी तु प्रसभमपि तानन्तिकगतान्नि
वत्र्य स्वर्लोकं नयति निजलोकं श्रुतिमता ॥ ३॥
अतो जल्पं जल्पं सरिदमृतकल्पं तव यश-।
स्तटे भ्रामं भ्रामं तव खलु निकामं शुचि यशः ॥
मुदा मज्जं मज्जं तव पयसि जन्माद्यकहरम् ।
सदा स्मारं स्मारं तव भवहमाहात्म्यमवरम् ॥ ४॥
अये कावेरि त्वत्तटसमटनादेवमनिशम् ।
नयेत्कालं मेलं तव किल जलं पुण्यधुनि शम् ।
तटे श्वोतारण्यप्रभृतिवरकाशीसदृशषण्-।
महाक्षेत्राण्यन्यान्यपि तव जयन्त्याधिविलये ॥ ५॥
कावेरि सिन्धो ननु दीनबन्धो
कारुण्यसिन्धो भवघोरसिन्धोः ।
मां तारय त्वं पतितोऽग्रतस्ते
तत्राप्यपेक्षार्हति साध्विनस्ते ॥ ६॥
पतितोद्धरणाय साध्वि चेद
वतारस्तव भूतले न चेत् ।
पतितं हि समुद्धरिष्यसि
स्वजनुस्त्वं विफलं करिष्यसि ॥ ७॥
कृच्छ्रादिकव्रतमिहाचरणीयमग्रे
नेप्येथ सद्गतिमितीच्छसि चेत्त्वदग्रे ।
वच्मि प्रसह्य खलु सह्यसुते पुनासि
त्वं सह्य इत्यृषिवचो विमतं करोषि ॥ ८॥
दीक्षा गृहीताजगरी गरीयसी
यद्रोधसि श्रीगुरुणारुणाभसा ।
कायाधवायापि मुदर्पितास्तुवत्
कावेरिकां तां खलु वासुदेवः ॥ ९॥
इति श्रीवासुदेवानन्दसरस्वतीविरचिता कावेरीस्तुतिः समाप्ता ।