कावेर्याष्टकम् अथवा सह्यकन्यकाष्टकम्
सरोज-सम्भवाच्युत-त्रिनेत्र-भावनामयीं
कवेर-राज-कन्यकां च कामितार्थ-दायिनीम् ।
अगस्त्य-कुण्डिकान्तर-प्रविष्ट-वारिरूपिणीं
भजामि सह्यकन्यकां भजामि सह्यकन्यकाम् ॥ १॥
पवित्र-धात्रि-वृक्षरूप-विष्णुपाद-सङ्गमां
पतत्रिरूप-धारि-विघ्नराज-चुञ्चु-चुम्बिताम् ।
भवाब्धि-तारकात्रिसूनु-पादुका-पवित्रितां
भजामि सह्यकन्यकां भजामि सह्यकन्यकाम् ॥ २॥
अनेक-कोटि-पुण्य-तीर्थ-सङ्गमेन पूरितां
अनोकह-प्रकीर्ण-पुष्प-पल्लवैः परिष्कृताम् ।
निनाद-पूर्ण-चारु-वीचि-कीर्ण-रत्न-मौक्तिकां
भजामि सह्यकन्यकां भजामि सह्यकन्यकाम् ॥ ३॥
तटद्वयेपि शम्भु-विष्णु-मन्दिरै-र्विराजितां
तटिल्लता-समान-देवसुन्दरीभि-राश्रिताम् ।
वटादि-वृक्ष-मूलवासि-मौनि-वृन्द-भावितां
भजामि सह्यकन्यकां भजामि सह्यकन्यकाम् ॥ ४॥
तरङ्ग-चारु-मेखलां विलोल-मीन-लोचनां
प्रवाळ-मौक्तिकोज्ज्वलां प्रफुल्ल-पुष्प-मालिकाम् ।
कुचायिताब्ज-कुड्मलां च कुङ्कुमादि-पाटलां
भजामि सह्यकन्यकां भजामि सह्यकन्यकाम् ॥ ५॥
भुजङ्ग-शायि-रङ्गनाथ-पाद-सेवनाशया
भुज-द्वयं प्रसार्य निःसृतामिव स्थितां मुदा ।
गजेन्द्र-केळि-वर्धिनीं द्विजेन्द्र-हर्ष-दायिनीं
भजामि सह्यकन्यकां भजामि सह्यकन्यकाम् ॥ ६॥
किरीटि-राम-शन्तनु-प्रभृत्यनेक-पार्थिवैः
प्रपूजितां च धर्मवर्म-राज-दाल्भ्य-कीर्तिताम् ।
धरातलैक-भूषणां सुरादि-सर्व-जीवनां
भजामि सह्यकन्यकां भजामि सह्यकन्यकाम् ॥ ७॥
प्रनष्ट-पञ्च-पातकां प्रकृष्ट-पुण्य-दायिकां
सहर्ष-दिव्य-केळिकां समुद्र-राज-नायिकाम् ।
सहस्र-पत्र-मालिकां सरोज-पत्र-दोळिकां
भजामि सह्यकन्यकां भजामि सह्यकन्यकाम् ॥ ८॥
सह्यकन्याष्टकमिदं पुण्यं प्रेमिकेन प्रकीर्तितम् ।
श्रद्धया कीर्तयन्नित्यं सर्वमङ्गळमाप्नुयात् ॥ ९॥
इति कावेर्याष्टकं अथवा सह्यकन्यकाष्टकं सम्पूर्णम् ।
Encoded by Musiri Janakiraman
Proofread by Musiri Janakiraman, Rajani Arjun Shankar