कुबेरकृत सीतास्तुतिः
कुबेर उवाच ।
धनाधिपतिरस्म्यहं जननि भक्तवर्यस्य ते
सखा हृदिनिरन्तरं किमपि भावयानः स्थितः ।
कदा खलु भवत्यहो जनकभूपतेर्मन्दिरे
शुभैरवतरेत्तरां भवति यन्निधीनां फलम् ॥ १॥
गायकेभ्यो नर्तकेभ्यस्तथैव च स्तावकेभ्यस्तथा ।
स्वस्तिवाचकेभ्यो ददे निधीन् ॥ २॥
अथ जन्मोत्सवदिने मातस्तव फलं गताः ।
आकरेषु चिरं रुद्धा निधयो मम हस्तगाः ॥ ३॥
भवत्या ये पत्यावुदयमुपयायाते दशरथ
क्षितीन्द्रस्यागरे व्यपितपरिशिष्टा विनिहिताः ।
निधीन् संस्कुर्वे तानहमधिकमद्य त्वदुदये
जगन्माङ्गल्यार्थे गुणवति वितीर्य द्विजगणे ॥ ४॥
अद्यास्माकमहोभाग्यं यक्षाणां बहुकालतः ।
सुसाध्यस्थापिता विद्याः करिष्यामः फलान्विताः ॥ ५॥
ता एव विद्याश्च गुणास्त एव तान्येव रत्नानि धनानि चैव ।
येषां खलु स्यादुपयोगयोगः प्रभौ प्रसादोन्मुखतामुपेते ॥ ६॥
अद्याहं रिक्तयिष्यामि निधिस्थानान्यशेषतः ।
तव जन्मोत्सवं प्राप्य दानैर्मानैश्च बन्धुषु ॥ ७॥
पुनस्तव विवाहादिकौतुके समुपस्थिते ।
त्वद्भाण्डागाराधिकारिमहद्भूतं भरिष्यति ॥ ८॥
न खल्वक्षयवस्तूनां विनाश उपपद्यते ।
भृतं भृतं रिच्यतेऽथो रिक्तं रिक्तं पुनर्भरेत् ॥ ९॥
सकुटुम्बोऽद्यनृत्येयं गायेयं च गुणांस्तव ।
विहरेयं हरेयं स्वं दद्यामद्यामथादपे ॥ १०॥
त्रिभुवनमङ्गलकारि त्वदीयमिदमद्भुतम् ।
जन्मनो चेत्कथमव्यक्तं भवति व्यक्तं परं ब्रह्म ॥ ११॥
नमो निष्करणोपाधिकरुणारसवारिधे ।
तुभ्यं त्रिभुवनोद्भासि कीर्तये ब्रह्ममूर्तये ॥ १२॥
नमश्चैतन्यसाक्षिण्यै स्वानन्दवपुषे भृशम् ।
स्वप्रकाशस्वरूपायै नीरूपायै सुरूपिणि ॥ १३॥
भक्तचेतश्चमत्कारिप्रेमानन्दैक मूर्तये ।
भुवनोद्भासिभाग्यौद्यभरितायै नमो नमः ॥ १४॥
स्वैरलीलाविनोदिन्यै वशिताधिकमूर्तये ।
तत्सङ्गामृतपानेनाप्यतृप्तमनसे नमः ॥ १५॥
श्रीभूलीलाद्यनन्तप्रकटगुणगणाख्यानरूपात्मिकायै
साक्षाच्छीरामचन्द्रामितरतिसुखितस्वादितस्वान्तरायै ।
भक्तैकानुग्रहार्थप्रसृमरविमलापूर्णकारुण्यलक्ष्म्यै
जानक्यै जन्मवत्यै खलु भुवि सहजायै परब्रह्मणे ते ॥ १६॥
इत्युक्त्वा पदयोः पपातः भगवान् राजाधिराजः प्रभु
र्भूयोवैश्रवणः स्थितः सविनयं बद्ध्वा तदग्रेञ्जलिम् ।
पद्माद्यैर्निधिभिः कृताञ्जलिपुटैर्जन्मोत्सवे सम्भ्रमं
कर्तुं भूरि समागतेः सहयुतः श्रीमैथिलेन्द्रालये ॥ १७॥
एवं सर्वे सुरौद्याः स्तुतिमतुलतरां श्रौतवाक्यैः प्रमाणै
र्निर्मायानन्तकोटिप्रचुरगुणगणाख्यायकैर्भूरि वारम् ।
ब्रह्मेशानौ रमेशं सुरपतिमपि चोच्चैः पुरस्कृत्य
याताः प्रेमानन्दाब्धिवीचिसमुदयनिभृतोद्धूतचित्तावगाहाः ॥ १८॥
इति श्रीमदादिरामायणे ब्रह्मभुशुण्डसंवादे पश्चिमखण्डे भरतलक्ष्मणीये
सीताजन्मोत्सवे कुबेरकृतस्तुतौ षड्विंशोऽध्यायः ॥ २६॥
भुशुण्डिरामायणम् । पश्चिमखण्ड । अध्याय २६/१-१८॥
bhushuNDirAmAyaNam . pashchimakhaNDa . adhyAya 26/1-18..
Encoded and proofread by Mrityunjay Rajkumar Pandey