Lekhini Stotram with 32 Names with Namavali

 लेखिनि द्वात्रिंशन्नामस्तोत्रम् नामावलीसहिता 

भैरव उवाच ।
गुह्यानां गुह्यरूपां तां लेखिनीं लेखिकां सदा ।
वक्ष्यामि द्वात्रिंशन्नाम्नां स्तोत्रं सिद्धिप्रदं परम् ॥ १॥

तस्य श्रीद्वात्रिंशन्नामस्तोत्रस्य ऋषिः शिवः स्वयं स्मृतः ।
अनुष्टुप्छन्द उद्गीतं देवता लिङ्गलेखिनी ॥ २॥

हकारबीजसंयुक्तं रकारः शक्तिरुच्यते ।
ईकारः कीलकं प्रोक्तो बिन्दुरस्त्रं प्रकीर्तितम् ॥ ३॥

लेखभाग्यपरिवर्ताय जपे विनियोगः स्मृतः ।
ध्यायेल्लिङ्गालिङ्गिनीं देवीं लेखिनीं लेखिकां पराम् ॥ ४॥

चतुर्भुजां दशभुजां महाब्रह्माण्डशासिनीम् ।
मुण्डमालावृतां देवीं वीणालेखिनिहस्तिकाम् ॥ ५॥

अथ स्तोत्रम् ।
ॐ लेखिनी लीलया लक्ष्या लयातीता लसत्प्रभा ।
ललामभूता लोकेशी लोकबीजा लसन्मतिः ॥ ६॥

लीनतत्त्वा लिपिश्रीशा लक्षणज्ञा लयेश्वरी ।
लक्ष्यार्था ललितोदारा लुप्तमायाविभेदिनी ॥ ७॥

लेश्यातीता लोकमाता लेखसूत्रप्रवर्तिनी ।
लयरेखा लोकसाक्षी लीलामौनप्रकाशिनी ॥ ८॥

लब्धबोधा लिङ्गरहिता लोचनातीतलोचना ।
लसद्बोधा लोकगुह्या लीलावर्णप्रसूतिका ॥ ९॥

लोकातीता लयप्रज्ञा लक्षकोटिप्रकाशिनी ।
लेखविद्या लब्धसिद्धिर्द्वात्रिंशन्नामभिः स्तुता ॥ १०॥

एतानि नामानि नित्यं यः पठेद्भक्तिसंयुतः ।
नामपाठमात्रतोऽस्य पुनर्जन्म न विद्यते ॥ ११॥

श्मशाने राजद्वारे च सङ्ग्रामे शत्रुसङ्कटे ।
अरण्ये दुर्गमे मार्गे जयस्तस्य न संशयः ॥ १२॥

दरिद्रो लभते लक्ष्मीं निराशी लभते श्रियम् ।
अकीर्तिर्लभते कीर्तिं मानं लोकेषु विन्दति ॥ १३॥

अपुत्रः पुत्रमाप्नोति विद्यार्थी लभते श्रुतिम् ।
मूको वाक्पतिरायाति निर्बलो बलवान्भवेत् ॥ १४॥

लिङ्गविद्याप्रसादेन लिङ्गसिद्धिः प्रजायते ।
अन्तर्बोधः परो यस्य बहिः सिद्धिर्निरन्तरा ॥ १५॥

भौमामावास्यकाले तु रक्तलेख्येन यत्नतः ।
भूर्जपत्रे समालिख्य पूजयेद्गुरुमग्रतः ॥ १६॥

यस्मिन्गृहे प्रतिष्ठाप्य पूजितं भक्तिभावतः ।
तत्र श्रीर्निश्चला नित्यं वृद्धिर्भवति सर्वदा ॥ १७॥

गुरुं सम्पूज्य विधिवत् जपेन्मन्त्रविदां वरः ।
द्वात्रिंशत्सहस्रसङ्ख्यं पुरश्चर्यमुदाहृतम् ॥ १८॥

मोहरात्रौ विशेषेण कालरात्र्यर्धयामिनीम् ।
अष्टोत्तरशतावृत्त्या स्तोत्रसिद्धिः प्रजायते ॥ १९॥

सिद्धे स्तोत्रे महेशानि वाक्सिद्धिः करसंस्थिता ।
अणिमाद्यष्टसिद्धयश्च सेवन्ते तं निरन्तरम् ॥ २०॥

महापद्मादिनवनिधयः सम्पदः सकलाः शुभाः ।
स्वयमेवोपतिष्ठन्ते प्रसन्नायाः प्रसादतः ॥ २१॥

यदभीष्टं मनस्यस्य तत्तदाप्नोत्यसंशयम् ।
विद्यां राज्यं यशः श्रीं च सौभाग्यं च दिने दिने ॥ २२॥

रहस्याद्रहस्यमेतन्न देयं यस्य कस्यचित् ।
परीक्ष्य भक्तिसम्पत्तिं ततः शिष्याय दापयेत् ॥ २३॥

योनिमुद्रां प्रदर्श्याथ दशवारं समाहितः ।
पठेदेतन्महास्तोत्रं सर्वपापैः प्रमुच्यते ॥ २४॥

देहः क्षेत्रं मनो यन्त्रं प्राणो दीपः सनातनः ।
भक्तिः पुष्पं गुरुर्धूपः स्वसंवित्परमं हविः ॥ २५॥

न वेदैर्न तपोभिर्वा न दानैर्यज्ञकोटिभिः ।
यादृशी जायते प्रीतिः स्तोत्रस्यास्य प्रकीर्तनात् ॥ २६॥

सर्वगोप्यमिदं स्तोत्रं देवैरपि सुदुर्लभम् ।
गुह्याद्गुह्यतरं ज्ञेयं सिद्धिदं मोक्षदं परम् ॥ २७॥

इति श्री भैरवभैरवी संवादे लेखिनीद्वात्रिंशन्नामस्तोत्रं सम्पूर्णम् ।

अथ नामावलिः ।

श्रीलेखिन्यै नमः ।
श्रीलीलयायै नमः ।
श्रीलक्ष्यायै नमः ।
श्रीलयातीतायै नमः ।
श्रीलसत्प्रभायै नमः ।
श्रीललामभूतायै नमः ।
श्रीलोकेश्यै नमः ।
श्रीलोकबीजायै नमः ।
श्रीलसन्मतै नमः ।
श्रीलीनतत्त्वायै नमः । १०
श्रीलिपिश्रीशायै नमः ।
श्रीलक्षणज्ञायै नमः ।
श्रीलयेश्वर्यै नमः ।
श्रीलक्ष्यार्थायै नमः ।
श्रीललितोदारायै नमः ।
श्रीलुप्तमायाविभेदिन्यै नमः ।
श्रीलेश्यातीतायै नमः ।
श्रीलोकमात्रे नमः ।
श्रीलेखसूत्रप्रवर्तिन्यै नमः ।
श्रीलयरेखायै नमः । २०
श्रीलोकसाक्ष्यै नमः ।
श्रीलीलामौनप्रकाशिन्यै नमः ।
श्रीलब्धबोधायै नमः ।
श्रीलिङ्गरहितायै नमः ।
श्रीलोचनातीतलोचनायै नमः ।
श्रीलसद्बोधायै नमः ।
श्रीलोकगुह्यायै नमः ।
श्रीलीलावर्णप्रसूतिकायै नमः ।
श्रीलोकातीतायै नमः ।
श्रीलयप्रज्ञायै नमः । ३०
श्रीलक्षकोटिप्रकाशिन्यै नमः ।
श्रीलेखविद्यायै नमः । ३२

इति लेखिनीद्वातिंशन्नामावलिः सम्पूर्णा ।


Encoded and proofread by Durga Sharma