Markandeyaproktam Narmada Stotram

मार्कण्डेयप्रोक्तं नर्मदास्तोत्रम्

नर्मदा सरितां श्रेष्ठा रुद्रदेहाद्विनिःसृता ॥ २७॥ तारयेत्सर्वभूतानि स्थावराणि चराणि च । सर्वदेवाधिदेवेन ईश्वरेण महात्मना ॥ २८॥ लोकानां च हितार्थाय महापुण्यावतारिता । मानसं वाचिकं पापं स्नानान्नश्यति कर्मजम् ॥ २९॥ रुद्रदेहाद्विनिष्क्रान्ता तेन पुण्यतमा हि सा । प्रातरुत्थाय यो नित्यं भूमिमाक्रम्य भक्तितः ॥ ३०॥ एतन्मन्त्रं जपेत्तात स्नानस्य लभते फलम् । नमः पुण्यजले देवि नमः सागरगामिनि ॥ ३१॥ नमोऽस्तु पापनिर्मोचे नमो देवि वरानने ॥ ३२॥ नमोऽस्तु ते ऋषिवरसङ्घसेविते नमोऽस्तु ते त्रिनयनदेहनिःसृते । नमोऽस्तु ते सुकृतवतां सदा वरे नमोऽस्तु ते सततपवित्रपावनि ॥ ३३॥ इति श्रीस्कन्दपुराणे आवन्त्यखण्डे रेवाखण्डे त्रिचत्वारिंशा- ध्यायान्तर्गतं मार्कण्डेयप्रोक्तं नर्मदास्तोत्रं समाप्तम् । स्कन्दपुराण । आवन्त्यखण्ड । रेवाखण्ड । अध्याय ४३/२१-३३॥ skandapurANa . AvantyakhaNDa . revAkhaNDa . adhyAya 43/21-33.. Proofread by PSA Easwaran