Oshadhibhih Kritam Gautami or Ganga Stotram

ओषधिभिः कृतं गङ्गास्तोत्रम् ८

(ओषधिभिः कृतं गङ्गास्तोत्रम्) ओषध्य ऊचुः । किं वाऽकरिष्यन्भववर्तिनो जना नानाघसङ्घाभिभवाच्च दुःखिताः । न चाऽऽगमिष्यद्भवती भुवं चेत्पुण्योदके गौतमि शम्भुकान्ते ॥ ९॥ को वेत्ति भाग्यं नरदेहभाजां महीगतानां सरितामधीशे । एषां महापातकसङ्घहन्त्री त्वमम्ब गङ्गे सुलभा सदैव ॥ १०॥ न ते विभूतिं ननु वेत्ति कोऽपि त्रैलोक्यवन्द्ये जगदम्ब गङ्गे । गौरीसमालिङ्गितविग्रहोऽपि धत्ते स्मरारिः शिरसाऽपि यत्त्वाम् ॥ ११॥ नमोऽस्तु ते मातरभीष्टदायिनि नमोऽस्तु ते ब्रह्ममयेऽघनाशिनि । नमोऽस्तु ते विष्णुपदाब्जनिःसृते नमोऽस्तु ते शम्भुजटाविनिःसृते ॥ १२॥ इति ब्रह्मपुराणे एकोनविंशाधिकशततमाध्यायान्तर्गतं ओषधिभिः कृतं गौतमी (गङ्गा)स्तोत्रं सम्पूर्णम् । ब्रह्मपुराण । अध्याय ११९/९-१२॥ brahmapurANa . adhyAya 119/9-12.. Proofread by PSA Easwaran