Priyavratakritam Shashthidevi Stotram

 प्रियव्रतकृतं षष्ठीदेवीस्तोत्रम् 

प्रियव्रत उवाच ।
नमो देव्यै महादेव्यै सिद्ध्यै शान्त्यै नमो नमः ।
सुखादायै मोक्षदायै षष्ठीदेव्यै नमो नमः ॥ ५७॥

वरदायै पुत्रदायै धनदायै नमो नमः ।
सुखदायै मोक्षदायै षष्ठीदेव्यै नमो नमः ॥ ५८॥

शक्तेः षष्ठांशरूपायै सिद्धायै च नमो नमः ।
मायायै सिद्धयोगिन्यै षष्ठीदेव्यै नमो नमः ॥ ५९॥

पारायै पारदायै च पारायै सर्वकर्मणाम् ।
सारायै सारदायै च षष्ठीदेव्यै नमो नमः ॥ ६०॥

बालाधिष्ठातृदेव्यै च फलदायै च कर्मणाम् ।
कल्याणदायै कल्याण्यै षष्ठी देव्यै नमो नमः ॥ ६१॥

प्रत्यक्षायै च भक्तानां सर्वेषां सर्वकर्मसु ।
पूज्यायै स्कन्दकान्तायै षष्ठीदेव्यै नमो नमः ॥ ६२॥

देवरक्षणकारिण्यै वन्दितायै नृणां सदा ।
शुद्धसत्त्वस्वरूपायै षष्ठीदेव्यै नमो नमः ॥ ६३॥

धनं देहि प्रियां देहि पुत्रं देहि सुरेश्वरि ।
हिंसाक्रोधैर्वर्जितायै षष्ठीदेव्यै नमो नमः ॥ ६४॥

भूमिं देहि प्रजां देहि देहि विद्यां सुपूजिते ।
धर्मं देहि यशो देहि षष्ठीदेव्यै नमो नमः ॥ ६९॥

कल्याणं च जयं देहि षष्ठीदेव्यै नमो नमः ।
इति देवीं च संस्तूय लेभे पुत्रं प्रियव्रतः ॥ ६६॥

इति श्रीब्रह्मवैवर्त्ते महापुराणे द्वितीये प्रकृतिखण्डे
त्रिचत्वारिंशाध्यायान्तर्गतं प्रियव्रतकृतं षष्ठीदेवीस्तोत्रं
समाप्तम् ।

ब्रह्मवैवर्तपुराण । प्रकृतिखण्ड । अध्याय ४३/५८-६६॥


brahmavaivartapurANa . prakRRitikhaNDa . adhyAya 43/58-66..

Proofread by PSA Easwaran