श्रीराज्ञीस्तुतिः
ॐ संसारसागरमहं तरितुं सुनौकां
राज्ञीं नमामि शिरसा शिवसुन्दरीं त्वाम् ।
सर्वेश्वरीं सकललोकसुखप्रदात्रीं
त्वामेव देवि सततं शरणं प्रपद्ये ॥ १॥
मातः पयोधरयुगं पिबतु त्वदीयं
नागाननर्तुमुखवत्सलपुत्रयुग्मम् ।
निर्णेजनाम्बुन इह स्पृहयाम्यहं तु
त्वत्पादपद्मयुगलस्य भवाग्निशान्त्यै ॥ २॥
मातस्त्वदीयपरितोषविशेषलब्धे
छत्रे प्रहृष्यतु सदा भगवान्सुरेन्द्रः ।
पीयूषवर्षणकरात्तव देवि पाद-
च्छत्राद्विना किमपि राज्ञि न नाम याचे ॥ ३॥
मोहाटवीविकटसङ्कटपीडितोऽहं
राज्ञी प्रपन्नपरमार्तिहरा त्वमेका ।
जाज्वल्यतेऽम्ब हृदयार्तिकरो ममान्तः
पापाग्निरेशि शमयैनममास्वरूपे ॥ ४॥
आरारटीमि करुणं भवतापतप्तः
प्रोल्लालपीमि पतितो भवदुःखसिन्धौ ।
मोमोर्मि राज्ञि लुठितो भवसर्पदष्ट-
स्त्वामन्तरेण शरणं मम कः शरण्ये ॥ ५॥
राज्ञि प्रपन्नवरदे सुकृतादपर्णां
त्वामाश्रितोऽस्मि सुचिरात्तु महद्विचित्रम् ।
किं नास्मि भैरवि ऋणैस्त्रिविधैर्विमुक्तः
पाशैरिवोत्कटविषाक्तभुजङ्गमानाम् ॥ ६॥
राज्ञि प्रसीद नतसौख्यकरे मृडानि
रुद्राणि रोगहरणे चतुरे प्रसीद ।
शर्वाणि सर्वजनपापहरे प्रसीद
गौरि प्रसीद गुणगौरि शिवे प्रसीद ॥ ७॥
कल्याणि राज्ञि जगदीश्वरि विश्वमात-
स्त्वामन्तरेण नहि देवि सुखं जनस्य ।
पुत्रस्य दुःखहरणे सततोद्यता द्राक्
मातैव हि स्नुतकुचा नु भवत्यवश्यम् ॥ ८॥
राज्ञष्टकमिदं पुण्यं यः पठेद्धर्षपूरितः ।
सोऽत्र द्राक् प्राप्नुयात्कामान्परलोके च स्वर्गतिम् ॥ ९॥
इति श्रीराज्ञीस्तुतिः सम्पूर्णा ।
Encoded and proofread by Harmander Singh