Shri Ramasundarakhyadvijakritam Samhitashri Stotram

श्रीरामसुन्दराख्यद्विजकृतं संहिताश्रीस्तोत्रम्

तावत् कश्चित् समायातः कदर्यस्तत्र भूसुरः । पत्रपुष्पजलयुक्तः संहितापूजनाय वै ॥ ८७॥ श्लोकमुच्चारयन् तस्थौ सम्मर्दे योषितां तथा । नमः संहितारूपाय माधवीस्वामिने नमः ॥ ८८॥ निर्मलानां हृदिस्थाय मोक्षदाय च ते नमः । नमो राधारमालक्ष्मीश्रीरूपायै मुहुर्मुहुः ॥ ८९॥ मोक्षदात्र्यै दिव्यमात्रे ज्ञानदायै च ते नमः । नमः श्रीकृष्णकान्तायै माणिक्यायै च ते नमः ॥ ९०॥ ब्रह्मविद्यास्वरूपायै धामशक्त्यै च ते नमः । नमः श्रीबदरीदेव्यै जयादेव्यै च ते नमः ॥ ९१॥ नमः प्रियायै दिव्यायै पारङ्गत्यै च ते नमः । नमो मात्रे महालक्ष्म्यै ललितायै च ते नमः ॥ ९२॥ ब्रह्मदात्र्यै परब्रह्मयोगदात्र्यै च ते नमः । इत्येवं स हरिकृष्णं तुष्टाव संहिताश्रियम् ॥ ९३॥ इति श्रीलक्ष्मीनारायणीयसंहितायाः तिष्यसन्तानात्मकस्य चतुर्थखण्डे ४६-अध्यायान्तर्गतं श्रीरामसुन्दराख्यद्विजकृतं संहिताश्रीस्तोत्रं सम्पूर्णम् । लक्ष्मीनारायणीयसंहिता । खण्ड ४। अध्याय ४६/८७-९३॥ lakShmInArAyaNIyasaMhitA . khaNDa 4. adhyAya 46/87-93.. Proofread by PSA Easwaran